張家輝自認天生反叛　呻忠角難演

（香港文匯報記者　梁靜儀）張家輝與梁洛施在電影《爆裂點》首度合作，二人異口同聲稱自己的「爆裂點」一定是親人，家輝更說為了女兒可以不惜一切。家輝以往演過不少反派角色都深入民心，今次其角色設定是好守規矩的警官，坦言反而令他很難演繹，並自認其內心有一個不守規矩的「張家輝」！

家輝與導演林超賢繼《魔警》後，相隔9年再次合動作片《爆裂點》，家輝指林導有一個改變是他意料不到的：「佢勤力過後生嗰陣，我都估唔到，可能係佢他一路拍，發展又多，想拍的嘢多咗，野心大咗，就每樣都想實行，就要給力啲，亦都因為相隔佢9年冇拍警匪，谷埋谷埋都好辛苦，一次過將積落嚟嘅主意想要呈現畫面都衝晒喺《爆裂點》度，（谷爆埋你？）有，個個都爆。」

雖然被谷到爆，但家輝大讚林導相比以前的作品到犀利，不論動作戲或文戲都想推得更盡，越發濃味，更加娛樂到觀眾的口味，因有趣味性才能吸引到觀眾去睇。導演對自己要求高的同時，可會對他的要求亦同樣高？家輝指林導演是一個文明的導演，會在安全下推攝動作戲，他說：「大家認識嘅林導喺九十年代已經拍好多機動部隊、槍戰動作戲，到現時在再合作，他都保持好文明、安全措施下去進行。」

飾演警察的家輝，戲中既要打、跑，還有槍戰場面，可會感到吃力？家輝坦言現今年代拍戲有CG幫手，拍戲舒服好多。不過受傷依然少不免，家輝今次亦有拗傷腳。他又覺得哪一場戲最有難度？家輝坦言：「又唔講得上係好難，反而覺得大家相隔咁耐又再拍返一部警匪片，又有咁多新拍檔，題材又爆裂，大家享受拍攝過程，尤其是首次同林導合作的演員，個個都好似視死如歸。」

年紀大開始「收火」

《爆》片中每個角色都因被人推到絕路而有「爆裂點」，他們的爆裂點又會是甚麼？已為人母的梁洛施說：「一定係屋企人，身為媽咪，觸發點一定喺細路身上。」家輝認為每個人單獨受到欺負或不公平都可忍受，但如果親友遇到就不可以，這都算是大家的爆裂點。戲中家輝為了兒子捱打十分鐘，問到現實中又可會為了女兒不惜一切？家輝肯定地說：「都會係。」家輝又自爆以前的人生當中好容易被一些事情觸發到：「我以前成日打架，現在唔敢啦，喺個心度諗啫，好容易觸發我。（爭女仔？）唔好講喇，以後都唔敢，年少無知嘛。」

至於家輝其中一幕親眼目睹兒子被燒焦的屍體，作為爸爸的他直言好崩潰，他認為導演林超賢的用意都是想觀眾跟演員同步直視殘暴的氣氛。問到事後如何抽離角色？家輝說：「趕快返屋企早啲瞓，打咗十幾日，魂魄都抽離咗啦，拍完之後好似卸低咗個重擔。」

黑化角色發揮更大

家輝曾經提到好人難做，他笑言其實是忠角難做：「最慘我睇住佢哋乜都做得，我就乜都唔准，好難做喎。一開始我知道係要設定我做一個好守規矩嘅警官，去到最尾點樣爆裂。」享受演奸角、黑化角色的家輝又說：「以前喺戲行經常聽到做戲一定要做正派，當時我對呢個說法好抗拒，直至後來我有機會演反派，例如《天地豪情》嘅Kelvin，我覺得做得好舒服，好理所當然，監製戚其義問我點演，我話會若無其事咁奸及殺人，出來的結果都好好，我一直覺得演灰色、黑化的角色，發揮空間較大，正如我攞獎的電影《証人》，都係這類角色，我係享受演呢類角色。」說到電影結局留下很多問題，問到若開拍續集，可想延續同梁洛施的感情？家輝說：「一定要啦，仲使講？」

現年59歲的家輝以往經常拍喜劇，提到近年他在戲中經常有動作戲，家輝無奈地說：「我唔知點解開始咗武打演員生涯，我拍《爆裂點》前喺內地已拍咗兩部戲都係要打，返來拍林導我都唔敢同佢講，我喺內地打咗好多，怕佢話要多啲。近年啲人要搵我演一啲好沉重又要打嘅戲，接住的戲都係咁，我又衰，好辛苦但又好鍾意，好矛盾，所以啲人睇到我呢個矛盾，就繼續搵我矛盾。至於以後拍唔拍動作片，都會視乎劇本和班底，衡量一下。」

無時無刻想轉戲路

從演三十多年，家輝由喜劇演員轉型拍動作戲，但他仍無時無刻想轉型，可是他對某些戲又不感興趣，他舉例說：「太淡口味的文藝片就最冇興趣，侯孝賢拍住個天空嗰啲我又唔得，太靜態我怕我又領略唔到，（愛情片呢？）原本同Bella（梁洛施）喺戲裏面有啲愛情成份，但因為我哋個角色太忙，付諸唔到時間去應付，但林導嗰種唔只係談情說愛，大家因命運而走埋一齊嗰種愛情我就得喎。」說到近年流行的韓國愛情片？家輝搞笑說：「唔得㗎，我做嗰啲心心(甫士）都唔得㗎，返屋企會嘔吐，要食止嘔丸，我自己做唔到，人哋做冇問題。」

演而優則導的家輝，自言若由他主導的話就會想拍一些怪及偏的題材，但就會較危險，主要是他內心不守規矩：「我係好反叛，唔鍾意守規矩嘅人，我係指喺事業上，我演藝意識係比較反叛，唔鍾意跟個軌道，希望大家估唔到我咁演，有時啲導演都唔知我會咁做，然後佢哋都唔知點做。」

梁洛施想做打女

家輝大讚首次合作的梁洛施，所演的毒師演得好睇：「呢個角色對佢幾好，可能大家對佢以前印象都斯文、靚女、文青，好有演戲天份，但唔會想到佢係毒師又會揸槍，現場睇到佢造型同角色都好好睇。」

梁洛施首度跟有「魔鬼導演」之稱的林超賢合作，她承認緊張一定有，因為未合作過，但又好開心有這個機會，有人信任她，找她拍動作戲。戲中首次拍開槍戲份的梁洛施，大呼好玩，事前更特地去學開槍姿勢，但可惜動作戲份少，她說：「其實我接林導嘅戲係有心理準備，預咗好似家輝咁，雖然人同我話林導啲戲好辛苦，係魔鬼導演，但我OK呀，好Ready，但好可惜只得一兩場，希望下次可以再發崛我多啲潛能。」梁洛施不諱言有向林導自薦拍動作戲，希望一嘗做打女滋味。

戲中梁洛施與許恩怡飾演兩母女，其一中幕泳池鬧女戲，梁洛施演出投入肉緊，令人印象深刻？現實中作為三子之母的梁洛施笑指角色容易代入：「因為鬧小朋友係必經階段，我畀個仔睇泳池鬧女嗰一幕，佢第一個反應就話『你就係咁樣鬧我哋。』」