香港文匯報訊 多年來蔡楓華（Ken哥）因咸豐年前《勁歌》季選節目上嘅一句說話，而被外界標籤為帶有針對性，亦因為後續唔少報道令大家以另類眼光看待佢。不過Ken哥呢次接受許文軒《StarTalk》專訪時決定一一反駁，亦以非常清晰嘅思路對答打破傳言。

即將再次踏上舞台開騷，堅持每年都要開騷嘅佢，話每一次演出都係為感激歌迷同支持者對自己嘅不離不棄。而每一次都會唱今年離世30周年嘅陳百強作品，係為紀念故友，亦係因為當年既係競爭對手，亦係最好嘅友情。

Ken哥早喺40年前已經開設製作公司，大大細細表演製作多不勝數，不過因為梅艷芳（梅姐）的一席話，而令佢主力發展個唱事業。近年每次都為自己演出自資製作，既係樂趣亦有錢賺，不過自資投資大型演出，佢就認為身份比較尷尬，所以寧願交予他人製作，而自己專心演出喇。

Ken哥堅稱「從未被接濟過」，雖然疫情數年無甚工作下，自己仍可以靠積蓄同投資收入生活。而多年來嘅同一個戴帽黑超造型演唱會海報，慢慢就發展成為自己嘅標誌，仲因為嫌麻煩而拒影新相，更認為自己想點做就要點做，懶理外界睇法，不過今年亦終於有新相新面貌，一新外界耳目。

當年《勁歌》報道一出一沉百踩，佢認為唔止負面，更係屬於「毀滅性報道」，聲稱佢精神出問題更係對藝人傷害難以彌補，佢呢日一一反駁，亦希望大家對任何收到嘅訊息都Fact Check辨真偽，雖然傷害已經無法挽回，只能夠繼續做好自己。

除咗開騷之外，平時甚少公開露面嘅佢，過往年輕喜愛飛車嘅日子俱往矣，閒時收藏唔同結他作興趣，亦會聽大量音樂，以幫助自己嘅創作靈感，仲打算再次推出全新歌曲。

多年來被外界誤解甚深，希望推出自傳嘅佢，暫時仍未有具體計劃。但係又提到經過今次演出之後，將會相隔一段長時間才會再公開演出，亦希望再踏紅館開多幾場一了心願，不過就因為行內「報復式」開騷，而要慢慢等檔期喇。孤單生活，始終會悶，呢日佢亦直接提到擇偶條件非常隨性，明白人揀我時我揀人之餘，答案似乎亦對感情相當有戒心，難怪佢話一切隨緣喇。