香港文匯報訊（記者 阿祖）李克勤與澳門管弦樂團舉行一連四場《我們的交響樂演唱會》，前晚中秋節首場，除了跟樂迷共度中秋外，同是澳門人的克勤父母、太太盧淑儀、兩個兒子以及外父外母都齊來支持，一起於澳門度過一個熱鬧的中秋。
前晚頭場， 克勤以《月半小夜曲》跟大家一同於舞台上賞月，又跟觀眾互動大合唱《紅日》，全場近萬觀眾一齊high，克勤對觀眾說：「好榮幸，入行幾十年很多歌都是廣東歌，不過有幾首歌真的是讓不會廣東話的人，為了可以唱到而去學廣東話，《紅日》就是其中一個好例子，無論去到世界什麼地方，無論他們是講普通話、英語、潮州話、上海話，都識唱《紅日》，這件事真的頗榮幸。不單止帶動到廣東歌、廣東話，亦都帶到正能量畀大家。」
在澳門過中秋，克勤謂以為未必有月餅食，沒料歌迷、朋友甚至特別嘉賓、表妹梁玉瑩都送月餅： 「成個後台有幾十盒，真係好誇張。做騷我不敢食咁甜嘢， 但都有食少少一啖仔應下節，其他留畀工作人員同屋企人食囉。」
被酒店貼心服務感動
是次演唱會， 克勤表示最難忘是酒店的貼心服務，為他作了最細心的安排，他必須公開向酒店致上最深的感謝：「過澳門之前，酒店有問我服務上有什麼需要，盡力安排。我話其實我想要一張好硬好硬的床，因為之前自己已經忙，一返香港又貪玩，明明個人都疲累，仲要去打波，就又傷條腰，搞到之前試過行路都要枴杖撐少少力，來澳門之前我都已經日日針灸物理治療，治療師叫我要瞓最硬的床，才可以快點好不容易再閃親， 我之前屋企直頭瞓地下。酒店點可能有似地板咁硬嘅床？所以我都係咁易講下，唔抱希望啦，點知到埗『倫敦人』（酒店）真係做到為客服務的100分，佢哋喺我張床的床褥下面直頭放咗塊木板，係我咁多年走遍大江南北第一次得到服務，見到塊板嗰一刻，直頭真係感動到眼濕濕啦，真係要公開多謝佢哋呀！綵排完我成身散晒返到房，撻落床嗰一刻我十足條死魚撻落砧板上一樣，個心除咗感恩都係感恩。」
今次澳門演唱會， 克勤不單換上全新歌單及製作，與香港演唱會不一樣，連舞台服裝都是全新，不少歌迷大讚他穿白色裙子跳《護花使者》很有感覺，修身西裝唱《大會堂演奏廳》又很帥，台上他跟觀眾打招呼講中秋節快樂，就已經有觀眾即時大叫「好靚仔呀！」他笑道：「咁假嘅說話你都講嘅？哈哈。對於着衫，坦白講我真係唔識，全是太太功勞。我平日出門最多就係波衫波褲，因為不用工作出門我就係打波，哈哈。」
0
已點過讚
0 / 255