港鐵聯同美紙於中環香港站舉辦《你在我心張國榮20年創作展》，有多名圈中好友出席，包括葛民輝、陳幼堅、文雋等，而一眾「哥迷」及好友均借出珍貴的張國榮收藏品，而葛民輝更製作了張國榮半胸雕像成為焦點，平時喜笑顏開的葛民輝都一本正經細訴同哥哥嘅點滴，「製作哥哥頭像花兩周時間完成，雖與哥哥未算親密，但從梅姐口中知道佢做嘢嘅工作態度，所以好佩服佢、值得我哋學習。

我同哥哥比較少合作，因為佢後期再出唱片時，都少去電台做訪問，而最衰我又唔係袁靚靚，冇得同佢《金枝玉葉》。

林敏聰借出《無心睡眠》填詞手稿，文雋一直收藏大量張國榮封面雜誌及書籍，呢次展覽更借出《愛火》及《有誰共鳴》簽名白版黑膠唱片等等，成為入場人士「打卡」熱點：「我其實收藏80、90年代巨星嘅封面，因為呢幾年疫情，令我有時間可以執吓啲收藏品，好好彩都保存得好靚。」

而陳幼堅就話屋企有專櫃收藏哥哥的唱片封套，笑言展場唔夠大未能一一展出：「華星年代我哋唔係太熟，但都會邀請我上屋企食飯，佢真係好重感情！」《你在我心張國榮20年創作展》由昨日起至4月6日於香港站(已付車費區域近 C 出入口)舉行，市民入閘後免費進入展覽區。