謝霆鋒透露未來計劃

香港文匯報訊(記者 梁靜儀)謝霆鋒在《2023英皇電影巡禮》上除聯同陳家樂介紹主演的電影《海關戰線》，又透露將參演《怒火蔓延》、《無限任務》以及宣布將首執導演筒，拍攝由成龍監製的《新警察故事2》。

升呢做導演的霆鋒表示，以往都會有這個位(導演)他都會推辭，今次首肯全因原班人馬齊人：「難得成個班底及演員，包括吳彥祖、蔡卓妍等全部都喺度，但導演陳木勝已經離世，同成龍傾咗好耐，佢叫我拍，咁大家都喺度冇理由唔做。(搵返所有演員返嚟? )梗係，但都會加新演員，其實個故仔都係我寫嘅，(在香港拍攝?)係。」

近年多留在內地的霆鋒，被問到是否搬回港?他說：「我會飛嚟發去。(女友王菲陪同返港?)講返電影，(王菲陪你飛來飛去?)唔係，(會否與王菲一起拍電影?)一定唔會。」

至於他於《海關戰線》中擔任動作指導，霆鋒大讚各演員相當勤力，問到他會否做指導做到上癮時，他就笑說：「其實我拍咗咁多年動作電影，都會度啲動作俾自己，今次幫埋其他演員啫，分別唔好太大。(度啲高難度動作俾佢哋?)今次都唔算好多動作場面。」

將於下月24號結婚的陳家樂日前偕未婚妻連詩雅到前往東京影婚紗相，他笑言比拍戲更忙：「影完相已經好攰，辛苦過開工，(何時停工?)唔會停工，但暫時冇戲拍，我都想多啲其他工作，要搵錢養家呀。」他又透露到時擺20圍酒席，公司大部份同事都會請。