肥媽傾情獻唱文匯讀者　紅館相約大年初六

（香港文匯報記者 子棠）「『我嘅人又肥，我嘅腰又肥，你見到我靚女你咪亂嚟』...唱夠喇，留待1月27日及28日，好過癮㗎，演唱會喎，紅館呀，來捧場喇，到時見！」肥媽Maria Cordero和黑妹李麗霞專誠向文匯報讀者獻唱兩句，作大年初六及初七舉行的演唱會預演，歌詞鬼馬有趣，必定為今個新春提升許多樂趣。而過往肥媽舉行演唱會，老公Rick都必定在身旁照顧及打鼓，今次雖然未能相伴左右，不過肥媽已為老公預留座位。

肥媽定於大年初六及初七在紅館舉行《肥媽面對面演唱會》與大家同賀新禧，亦是肥媽第一個紅館賀年騷，縱使疫情下也無法阻擋她一嚐開騷𢭃利是的歡樂體驗。「我會有辦法𢭃得到利是，阿倫（譚詠麟）都𢭃咗咁多年，仲唔輪到我，我幾難得先有個紅館賀歲騷，我第一次咋，所以大家最好準備利是，哈哈。」

廣結人緣的肥媽在圈中好友無數，橫跨老中青三代，表演嘉賓也來自不同年齡層，屆時更會與肥媽鬥唱鬥搞笑！她透露兩場合共有8個好友會上台，當中有黑妹、馬浚偉及《聲夢傳奇2》亞軍黃洛妍（Janees）。「演唱會將有兩個笑唱環節，黑妹近年同我經常拍住上搞笑，當然預佢，並且還有個神秘嘉賓。其實係好多朋友睇過演唱會流程都哈哈笑、爭着話要上台一齊玩，我講明做嘉賓唔單止要練歌、仲要畀我玩，佢哋都肯；呢3年大家都過得唔容易，希望觀眾睇完個騷會開開心心笑住咁離開。馬浚偉就話要上台同我合唱《也許有緣》，投訴我從未試過響演唱會唱過；至於Janees就一早預咗佢。」由於嘉賓眾多，肥媽笑謂：「有嘉賓話想早啲出場，我話唔制，話曬係自己嘅演唱會幾大唱咗先，所以已經安排咗自己唱頭兩Part，唔係我邊有得唱呀！」

肥媽多年來與老公Rick一直秤不離砣，可惜Rick不幸於2020年11月病逝。提到今次是肥媽痛失愛夫後第一次舉行演唱會，她表示每逢開騷，老公都會為她打鼓，今次不單止會為老公預留座位，還會預留鼓手位，及為老公獻唱《憑著愛》一曲，說時，肥媽雙眼通紅。再問是否仍有很多說話想跟老公說，她更立即淚如雨下謂：「係呀，呢20多年我哋實在太開心，每日都太恩愛，記得去年老公死忌一周年、咁啱出席Uncle Ray的Party，我落返台都忍唔住喊，有人就話我，人哋結婚半世紀都無我同老公咁恩愛，係一種祝福，認為我應該做啲嘢比老公睇。的確老公臨死前有個要求，就係要我應承佢一定要繼續做網上頻道，其實當初係佢叫我做，因為當時老公病咗，我每日返屋企煮嘢比佢，再去醫陪佢瞓，做頻道時我就可以稍為抽離一下，老公亦會睇住節目畀Like和心心，係我哋嘅一種溝通，好好玩又好溫馨；老公走咗後，都係靠呢個頻道幫助麻醉自己，令我可以快啲走返出來，仲有屋企嘅狗都好有靈性咁陪住我。其實我知道老公依然一直陪住我，因為每到晚上接近凌晨四點，全部狗都會一字排響樓梯、尾巴向同一方向搖擺，就知係老公返來，而呢段時間亦係以前我同老公傾偈最多嘅時間；有人話過我儍、仲當個老公響身邊，但我知佢係，亦好開心。」不過一眾兒孫就不會回港捧場，肥媽指因為一月是小朋友考試期，加上兒孫已訂了機票2月回港為她辦70大壽，單是機票錢已數十萬元，不想兒孫們太花費和頻撲。

開騷前，肥媽還要先錄製一首歌，她透露黃家強找到一首黃家駒為她撰寫的歌，經過一年多的傾談及修改歌詞，終於取得內地發行，正式可以錄音，並希望能於演唱會唱出來。除了準備開騷，肥媽還要做自己的頻道教煮食、KOL、擔任《中年好聲音》評判談，還要打理生意、照顧狗仔和種植，相當繁忙，不過她最致力的還是行善；談到未來計劃，她媽表示現在已無慾無求，工作心態是天生我才必有用，認為剩係食老本、對社會及家庭沒有貢獻，做人也沒意義，未來會朝着這個方向，運用自己的智識與專長幫助家人，參與慈善，幫助長者及有需要的人士。

記者：子棠

拍攝：黃金源

剪輯：唐王心、黃金源

場地：Villa 26