【粵語講呢啲】千祈·喊得一句句·冇你修·雞忘記

梁振輝 香港資深出版人

「千祈」相當於書面語嘅「千萬」。點解廣東人會將呢個指無論如何嘅詞講做咁，同埋點解用最深個「祈」而唔係其他幾個淺啲嘅：其、期、奇。「千祈」有「祈」求你「千」萬唔好咁嘅意思，所以唔做得唔用呢個字㗎！

講到「千祈」，好多人都會噏得出一個極具代表性嘅人物，就係人稱「配音皇帝」嘅譚炳文。

譚炳文響1985年同尤伯連納死之前告誡世人唔好食煙條宣傳短片配音：

…我要話畀你哋知，唔好食煙，無論點都好，「千祈」唔好食煙，如果我以前冇食煙，我好相信我而家唔會喺呢度同你哋講我生肺癌嘅嘢。

呢條短片可以講得係譚炳文其中一個代表作，不過亦都帶嚟咗負面影響。佢喺過咗好多年之後接受訪問嗰陣話當年嘅香煙廣告商就係因為佢拍咗呢條戒煙宣傳片就唔搵佢拍廣告，連簽咗約都話要同佢解約，譚炳文話呢單嘢真係「喊得一句句」。「一句句」指連續多句，比喻連續不斷。廣東人嘅「喊得一句句」嘅表面意思係唔停咁喊，係用嚟形容狀況好淒慘嘅；正正係：

尤伯連納勸戒煙 譚炳文傾力聲演

香煙廣告冇得撈 勢估唔到咁糟糕

人稱「鬼才」嘅黃霑有鋪煙癮冇人唔知，2004年佢死於肺癌。以佢嘅才智唔會唔知吸煙危害健康嘅，不過佢個人大情大性、做人做事至緊要開心，所以從冇諗過去戒煙；正正係：

自我滿足每一天 黃霑死都唔戒煙

告之千祈咪食煙 佢話唔食人都癲

據講黃霑身邊好多好朋友都知道佢身體出現問題而勸佢戒煙，佢就係死都唔聽，呢啲咪叫冇「冇佢修」囉！

廣東人遇到啲人冇佢辦法就會講「冇你修」；如果用「修為」個「修」，真係唔會睇得出有呢個意思，不過幾乎係人都咁寫。「不可收拾」指不可挽回，咁即係點都冇法子搞得掂，所以筆者認為個「修」字應該換做「收拾」個「收」至啱；亦即係話「冇你收」先至係正寫，不過你咁寫十居其九啲人都會話你錯，咁大家知咗就算嘞！有時唔係你想同流合污，個大環境係咁你都「冇佢修」！

翻查字典，「嗉」(口字邊做個素)讀做「素」，「嗉囊」係鳥類喉嚨下面暫時寄存食物嘅地方；「脺」(月字邊做個卒)讀做「脆」，「脺臟」同「嗉囊」都係「胰臟」嘅別名。雞其中一個部位，叫做「雞忘記」，好多人都以為係「雞尾」，即係「雞屎忽」。其實「雞忘記」係指「脺臟/嗉囊」，個名嘅由來唔因為佢size細而容易畀人忽略，只係因為舊時一般家庭唔係時時有雞食，大人想啲細路食多啲雞肉、少食啲內臟，先呃佢哋食咗「雞忘記」會冇記性啫。