（香港文匯報記者 藍松山）黃圈經常一言不合便開片，事實上都係一個「錢」字作怪。「毛記葵涌」於2018年入股靠「黑暴財」發家嘅「渣哥」，之後又數次夾份投資成立新舖，𠵱家「渣哥」想踢佢哋出局。「大渣哥茶記」Facebook噚日發帖話，以「早於年多兩年前，公司之主要股東毛記葵涌已經沒有任何代表參與渣哥及大渣哥之管理及營運」為由，於今年2月初要求以2018年當時入股之同樣條件之下，以現時實際市值購回毛記葵涌持有之49%股份，但月初收到毛記葵涌開出的價錢，聲稱令佢哋「非常震驚」，於是話可能會「集體辭職」以作「抗議」。不過就有人質疑佢哋扮豬食老虎，又想用「納米樓嘅價錢，就買返晒半間渣哥嘅意思」，搞到一地花生。
「渣哥」噚日喺「大渣哥茶記」Facebook發帖稱，「毛記葵涌」於2018年入股，𠵱家「渣哥」想買返啲股份，於是自今年2月開始已「要求以2018年當時入股（只計算實際資產及負債）之同樣條件之下，以現時實際市值購回毛記葵涌持有之49%股份」。然而「直至本月初，收到毛記葵涌開出的價錢，整個渣哥團隊都感到非常震驚」。
「渣哥」形容該價錢「無能為力」、「接受不了」，然後聲言「渣哥團隊可能會集體辭職離開渣哥大渣哥」，跟住又賣慘「縱使萬般不捨及面對鵲巢鳩佔嘅殘酷現實，但在別無他法之下，集體辭職亦都可能係作為一間小店，能夠向財雄勢大嘅上市集團作出抗議控訴嘅唯一方法。」
「渣哥」講得咁「情真意切」，俾唔少人質疑佢藉機搞大件事搵着數。「徐風投資理財筆記」就摷返毛記葵涌（1716）2018年至2022的公司年報話：「用數字說話，渣哥創業團隊似乎想賣慘以掩飾其度縮意願。」佢分析話：「到2021年/ 2022年，……（渣哥）總收入6,100萬元，蝕380萬元。……截至2022年3月31日……渣哥團隊要求『只計算實際資產及負債』回購49%股份。……整個集團淨資產約830萬元，除返一半就係415萬元，即是創業團隊想用納米樓嘅價錢，就買返晒半間渣哥嘅意思。」
渣哥「小店」有6000萬營業額
「徐風投資理財筆記」用大家樂、大快活做參考，估計「渣哥」的價位應介乎1,660萬元至2,500萬元之間，除返一半就係880萬元至1,250萬元，「但渣哥則指『竟然被要求以倍數計嘅價錢』，又話自己係『小店』。原來有6,000萬元營業額都係小店，老實有幾多小店做得到？」
佢又話：「點解呢個時候想買返？《食神》有云：一間變兩間，兩間變四間……而咁啱呢個時間係飲食業低潮，蝕咗錢，用實際資產及負債（即是資產淨值）計價，自然再少一大截。」
網民譏「迫人平賣，不如去搶」
黃絲Fb專頁「本小姐」就覺得「啲嘢係人哋嘅，點止可以開天殺價，唔賣畀你都得。你迫人平賣畀你，不如去搶啦」，無幾耐再出post：「其實整個黃圈出嚟支持返黃店真係冇問題，但去到要正確化剝削其他人啲行為就真係好大問題。」
網民「Shandi Leung」就留言話：「你（渣哥）當日賣咗出去，就唔再屬於你架（㗎）啦，你想買返就出一個人哋滿意嘅價，明買明賣，有咩咁難接受？傾唔惦（掂）數就出PO公審，會唔會肉酸咗少少。」「Vincent Lam」就話，「其實正常，人哋投資，希望幾年得到相應回報，非常合理，價錢唔岩（啱）咪再傾囉，人地（哋）又冇阻你做生意，你想人地（哋）比（畀）錢落黎（嚟）投資，走既（嘅）時候冇回報咁走又好難。」
當然都有人覺得「黃店」大晒。「Ho Han」就支持「攬炒」，「搞佢蝕到連渣都冇埋，睇股份重（仲）值得幾多錢！」「徐朗」亦話，「盤數喺你手，你咪做到佢蝕到××囉。之後就係供股，注資，再供股再注資。毛記蝕緊錢，唔會同你玩科水遊戲，噉（咁）到（都）唔識玩？」
為咗個「錢」字，一言不合就攬炒，同黃圈人打交道，真係要小心睇路囉。
0
已點過讚
0 / 255