【粵語講呢啲】賣仔莫摸頭，摸親眼淚流

梁振輝 香港資深出版人

有老豆連個仔都賣得，就肯定去到山窮水盡；賣嗰陣如果仲去摸下個仔個頭，就即係唔捨得佢；大家喺度依依不捨，唔喊就有鬼喇！好多時因為出現咗呢個場面，個老豆就會即時終止交易。以下一句諺語：

賣仔莫摸頭，摸親眼淚流

就係提醒人賣得嘢就要硬着心腸；一衰心軟，當前嘅困境明明有轉機都變返冇，仲好大可能將現有問題深化。

2019年年初，「蓮香樓」第四代傳人顏先生意識到「蓮香樓」如果再係喺蝕本嘅情況下經營落去，肯定會好唔得掂，不如就喺未彈盡糧絕之前選擇摺埋佢，一則可以做到冇爭「街數」同埋伙記人工；二則就係留返啲彈藥，喺市況大好或者有人注資嗰陣東山再起。咁啱啲老伙記又因為做咗幾十年，唔捨得間舖頭，於是嚟個順水推舟，用特許經營方式，判畀班老伙記用「原始模式」喺原址度，開間淨係得飲茶嘅「蓮香茶室」，一則可以秉承「蓮香樓」一直對伙記有情有義嘅優良傳統；二則搵到一個不失為傳承祖業嘅方式。

作為「蓮香樓」第四代傳人，背負着呢個百年祖業，冇做臭個名係重中之重，唔係就辜負咗祖先一手創建嘅基業。能夠達成呢個算係「全身而退」嘅解決方案，雖然唔係咩「光彩結業」，但總算做到「光榮結業」。呢個轉變，就算係局外人都唔難睇到，接手嗰班人肯定係接咗支火棒。

世事難料，2019年3月開檔嘅「蓮香茶室」，玩唔夠幾個月就遇上「黑亂」；幾乎可以講喺呢段期間，冇一間食肆有運行。就係喺跌跌撞撞嘅情況下，「蓮香茶室」捱到2020年年初。常言道：福無重至，禍不單行，估唔到今次仲大鑊過上次；新冠疫情蔓延全球，禁足、封城、鎖國瓣瓣齊，搞到香港冇人嚟。大家都知道香港近年好倚賴內地人落嚟消費；再加上疫情嚴峻，冇人敢出街，淨係得返少少外賣，咁即係死得喇！顏先生睇見咁嘅環境，為咗救班舊伙記，冇理到家族成員嘅反對，接返嚟搞過「蓮香樓」。顏先生喺呢個時候作出「蓮香樓」復活嘅決定，除咗有違初衷，仲係同「找死」冇分別。冇錯，兩次到最後都係會死，不過今次可能死得更慘！

顏先生接手呢兩年，疫情冇好過，就算最近個市好返啲，都係僅限喺本地消費，點都冚唔返之前蝕到入肉嗰啲。卒之喺2022年8月8日，「蓮香樓」靜雞雞關門大吉。如果顏先生當日唔仗義拯救班舊伙記，大家嚟個長痛不如短痛，就可以避過「衰收尾」呢一劫！

就「蓮香樓」再度結業呢單嘢，「賣仔莫摸頭，摸親眼淚流」係最佳寫照，點解咁講？退咗場就唔應該再執返呢個爛攤子，走回頭路就注定有一日會走上不歸路；本來仲有機會翻身，而家就落得一個慘淡收場——人工街數拖欠、百年名聲受損。正正係：

若知賣仔莫摸頭，光榮結業何用愁