【粵語講呢啲】唔怕生壞命，最怕改壞名：阿茂、阿壽、陳福水，壞名？井淼、鑫淼，好名？

梁振輝 香港資深出版人

張國榮喺《為你鍾情1985》度個名叫「陳福水」，佢好似唔like人哋叫佢呢個名咁喎！「福」係福氣，「水」即係財；又富貴長壽又身家豐厚，咁叫「福水」仲唔天下無敵，照計佢唔應該抗拒「陳福水」呢個名㗎？

叫「某某人」，文雅啲就講「張三」、「李四」，通俗啲就講「阿邊個邊個」、「乜水」、「阿茂」、「阿壽」、「阿福」；鬼佬就叫阿Jack。講真，叫人「阿茂」、「阿壽」、「阿福」，除咗指隨便一個人，仲包含咗話佢冇咩見識呀、愚笨呀。「阿茂」係阿某嘅諧音，其實冇貶義。「阿壽」、「阿福」明明係指人長壽呀、富貴呀，乜得搞到變咗有貶義呢？富貴就係唔使做，成日冇嘢做就搞到個人呆呆滯滯；長壽係好，但係老到咁就思想遲緩。叫人「阿壽」、「阿福」，就係話佢個人呆呆滯滯、思想遲緩。「福水」個水，原來係「乜水」個水，呢個水就係「誰」，所以叫人「福水」同叫人「阿福」差唔多；咁睇，叫人「福水」一般都唔係咩好嘢！叫「某某人」好多時都會同佢安個姓，好似「張三」、「李四」嘅張同李。陳係廣東人嘅大姓，啲人咪安咗「福水」姓陳，照睇並唔係對姓陳嘅人有咩歧視嘅。嗱，聽完筆者解釋「陳福水」係咩一回事；如果你姓陳，你會唔會改個仔做「福水」，咁就由你自己決定嘞！

民間流傳：

唔怕生壞命，最怕改壞名

一般相信：

先天生壞命，後天可執正

後天改好名，整定你好命

就係咁，好多人都會去搵睇相佬改名。咩叫「好名」，以下係兩個例子：

「淼」，讀「秒」，指水勢浩大，咁即係多水。舊時大部分人食井水；就算係現代，身處偏遠村莊、冇供水系統，井水嘅供應仍然係好重要，所以「井水多」就係所有人嘅期盼。除咗「淼」，睇怕大家都應該冇可能同「井」搵到另一個最適合嘅配詞。咁睇，已故影星「井莉」老豆「井淼」個名改得真係正！

「鑫」，讀「音」，指興盛、多財，咁即係多金。舊時啲人改舖頭名或者人名嗰陣，都好喜歡用「鑫」呢個字嚟做配搭，無非都係想攞個好意頭。中國人以水為財，「鑫淼」呢個組合就等同超多財，迷信嘅人會認為個名改做「鑫淼」，第日實「發過豬頭」。

有啲名睇落去唔錯，但係好多時因為諧音嘅問題，會令人有不必要嘅聯想，咁「好名」都變成「壞名」；例如：莫財（冇錢、窮）、吳忠良（唔沖涼）、李煥然（你玩完）；正係：

先天改壞名，成世當笑柄

上述例子，純屬虛構；如有雷同，實屬巧合。