梅啟明堅持控告電影公司　自曝梅媽每月25萬生活費自己只2萬元

（香港文匯報記者 李思穎）梅艷芳胞兄梅啟明因要控告電影公司侵權其註冊了的「梅艷芳」商標，跟母親梅覃美意見分歧，致母子關係惡劣，梅媽怒斥梅啟明「財迷心竅」，更被激到入院，對於梅啟明一意孤行，梅媽日前登報要跟他脫離母子關係，劃清界線。梅啟明今日開記者會為自己「平反」，反指質疑母親收了錢才要他撤銷控告，並大爆梅媽在梅艷芳的遺產中每月收取25萬生活費，他從中才得2萬元，直言一定不會感恩。梅啟明亦否認有「包二奶」，但就理直氣壯表明有「女朋友」，真是一樣米養百樣人！

梅啟明今日在北角街頭舉行記者會，現場有近30名傳媒到場採訪，由於疫情嚴竣和限聚令關係，其間有警員到場了解後離去。戴上口罩的梅啟明手持大疊文件現身，訪問期間他多次咳嗽，但就自稱已接種好三劑疫苗，以及做過快速測試。

梅啟明主動提到被「脫離關係」的引爆點：「其一是電影公司的版權同商標問題，我04年已經註冊（梅艷芳）商標，某情況下，媽媽係咪收咗人錢?我唔知，當初是她叫我入紙，我先行呢步棋，我行咗你又話取消，唔係話鍾意食就食，唔鍾意食就吐返出嚟，問題就係呢度，也是同我脫離關係的導火線，佢係驚法律官司問題，若然沒有收過利益就唔使驚，其實係用我個名提告，跟她無關，她跟本沒法律責任，（你懷疑媽媽收過利益？）無錯，我問過佢，佢話無，亦無答我點解唔告，（不甘媽媽臨時縮沙？）可以咁講，但老人家不好怪佢，正式眼又矇耳又聾，可能是受人擺佈。」

梅啟明堅持會控告電影公司：「如果電影公司有心處理，應該知會我，一定要同我和談，如果賠償1元也好，要出來給公眾交待，這是我原則。」處於財困的他如何支付律師費？他說： 「這是另一問題，無錢有無錢告法，無錢咪個個死得冤狂，唔可以含冤，法律係咪公正先？」其間他向傳媒展示多份文件，並透露有另一單官司在身，正向「租霸」追索幾十萬賠償，被人走數導致經濟出問題才要向梅媽借錢，老人家不肯借，他先欠人10萬元以下債務，也是有限錢。

問她會否再搵梅媽商量？他謂：「無論點都好，你都要放鬆佢，佢都98歲，就快100歲，不過我死得快過佢，這半年好辛苦，得番半條命，昨晚嘔血咁。」梅啟明否認是自己激到媽媽入院：「她仍在醫院住緊千多呎套房，只在逃避，我打畀佢無聽我電話，老人家好易受人擺佈，（點解唔聽阿媽講放棄控告？）梗係唔聽，人要正，無理由你行曲都跟你行，做任何事也好幫理不幫親，阿媽生我出來一件事，（佢幫咗你好多年！）係有幫我，但我都有手有腳，我唔感恩，一啲都唔感恩。」

過去梅媽一直有供養梅啟明，這是否理所當然真的見人見智，梅啟明說：「你知唔知佢1個月收幾多錢，每個月收25萬，我只係攞2萬，唔係嫌唔嫌少問題，現在情況唔想多講，都過咗咁耐，（阿媽話你貪財？）我貪財一早貪咗，個個月貪個2萬蚊？仲話養我一家大細，你估我真係殘廢，我一直都有做散工，做過地盤、裝修、炒鑊，（是否你揮霍？）2萬蚊做得乜，我要供養仔女，要培養個仔，（老婆話你好少陪個仔？）我要搵食，唔係點養佢。」當問他是否「包二奶」以致一闊三大？他即說：「包二奶一事，大家太敏感，根本不是這回事，現在人哋幫緊我，我唔夠開支，唔係我畀錢人，唔係包二奶，有咩本事包，係女朋友。」他強調人個心要正，問他背妻識女朋友是否恰當？毫無內疚的他稱：「女朋友個個都有o架啦，我同老婆無離婚，我有女朋友，即使老婆要嗌離婚都無所謂，（這行徑會影響小朋友？）完全無問題。」梅啟明多次咳嗽，問他生病嗎，他謂:「我想死，死的原因是想證明畀阿媽睇，我所做係無錯，（想修補母子關係？）無所謂，有邊個唔想，你現在唔係有個金山喺度畀我去謀。」他又指已被梅媽截斷2萬元生活費。