壞消息！如果您收到以下電話　好大機會係騙徒

大公文匯全媒體報道：農曆新年將至，警方推出預防電話詐騙小貼士。警方指出，只要您有電話，您就會有機會墮入電話騙案嘅危險。2021年全年，警方一共錄得1140宗電話騙案，損失金額高達8.1億元，即係差唔多要中8次新年金多寶！您以為您係專業人士就可以有電話騙案免疫？Sor，唔係囉！如果您收到以下電話，同您傾計嘅人，好大機會係騙徒……

第一步：騙徒講得出您嘅個人資料，例如姓名、地址、電話、身份證號碼等。（唔係乜嘢咁神奇，今時今日資訊泛濫，要知道姓名呢類基本資料，一啲都唔難！）

第二步：騙徒用有假蓋印，有埋您姓名、身份證號碼、甚至照片嘅假內地法院文件同埋假拘捕令去嚇您。

第三步：騙徒仲會用以假亂真嘅執法機構網站，要求您輸入網上銀行帳戶登入資料同埋密碼。

第四步：用「社會孤立」式心理操控，要您24小時視訊，同着住「制服」嘅騙徒保持通話，要您報告行蹤，仲唔俾您向任何人透露事件。

第五步：騙徒要求您安裝一個叫「安全防衛」嘅木馬程式，目的係盜取您個人資料、網上銀行登入資料，及由網上銀行發出嘅一次性密碼。

第六步：然後……仲然後？！一收到騙徒來電，梗係即刻收線啦！

警方提醒您：

• 切勿下載不明來歷的應用程式
• 如果接到「+」字頭電話，但自稱係本地電話，好有可能係詐騙電話
• 收到陌生人來電要求提供個人資料，緊記立即收線，同埋主動核實來電者身份。

「提防騙子，由您開始，記得提醒身邊人呀！」。