張崇基 張崇德 重返發跡地開騷別具意義

香港文匯報訊（記者 李思穎）張崇基及張崇德兄弟將會舉行跨年騷，也是他們最後一次返回伊館這個發跡場地開騷，所以別具意義會分外珍惜。

崇基和崇德接受主播許文軒訪問，說到年底的演唱會命名《最後的基會難德演唱會》，言下之意是最後一次開騷，崇德解釋：「一來阿哥已經移居加拿大，未必有機會返香港搞騷，疫情之後有好多變化更加難作估計，而且今次係第十次開演唱會，第十次好似好圓滿！」他們續說：「最唔捨得係粉絲，我哋一步一步行到呢度，有好多粉絲第一日已經支持我哋，但佢哋好慘，以前話畀人知鍾意我哋便會俾人笑，我聽到嘅時候好心噏，點解我做歌手，做到鍾意我哋嘅人會被人笑。」

音樂路上遭潑冷水

兩人所走的音樂路絕對不容易，中間遇過不少難聽說話，說到他們做歌手曾經備受質疑，崇德坦言：「唔係質疑，係直頭話我哋唔得，我哋明白做到演唱會嘅歌手係邊種，要拿過獎，有Hit歌同人氣，但我哋完全冇，記得2002年，大約20年前我哋做幕後居多，分別同唔同嘅娛樂公司傾，佢哋真係有問我哋有乜Hit歌？有冇劇出？有冇歌上榜？我哋乜都冇，就話咁仲搞咩啫！當時我哋心裏面有啲唔忿氣，因為之前推出發燒碟，喺冇宣傳情況下賣過二萬幾隻，既然有人聽即係有人會睇啦！所以決定自己搞，當知道全場爆滿，我哋真係好感動！所以今次最後一次去返伊館，呢個發跡地開騷，真係好有意義。」

兩兄弟互相感謝對方，崇基謂：「多謝上帝畀咗個咁好嘅細佬我，我性格比較浪子，好多時感覺唔係好積極，但細佬一直推動我行，如果唔係佢親力親為落手搞第一次嘅演唱會，我根本冇可能繼續唱下去，所以我哋今次會好好珍惜呢次最後嘅演出。」