之前話「忍夠黃絲分化，決定脫離黃圈，不再用顏色分人」嘅黃店「程班長台灣美食」，點都估唔到連宣布即將執笠都會引發黃圈嘅內訌大戰。「程班長台灣美食」日前於facebook發帖話預計會做到出年3月中左右，原本稀鬆平常嘅決定，就被黃絲攞嚟批鬥「熱狗」（「熱血公民」），鬧佢哋之前有份搞「程班長」。不過，前「熱狗」主席蟲泰（鄭松泰）都不甘示弱，噚日喺facebook回串，話「程班長」唔做，係因為黃絲唔珍惜用心經營嘅食肆，立場先行去批鬥佢哋，搞到好多老闆都做到無癮。

「程班長」前日宣布出年3月結束營業，有網民就喺連登話都係因為「熱狗」。網民「陳_綺貞」就話：「之前班死熱狗攪程班長。」「Xavi」就揶揄「熱狗」：「淨係識周圍咬人。」「Li Wing Keung」就話：「唔好扮唔記得，你地（哋）熱狗page係其中一班人追（狙）擊程班長，而（𠵱）家就想卸返個波落（攞）俾（畀）人？」

蟲泰噚日喺facebook回擊話「程班長」唔做，「連登咁都有得抹黑熱狗」。佢又話：「程班長唔做，係因為黃絲唔珍惜用心經營的食肆，立場先行去批鬥小店、食肆，好多老板（闆）都做到無癮。」又聲稱：「本來大家目標係捍衛自由經濟，但政治批鬥小店足足搞足兩年，一邊捍衛自由、一邊搞『文革』批鬥，如此精神分裂，係老板（闆）都唔想做落去啦。」

網民指黃絲「鬥黃」賴熱狗

有黃絲站隊蟲泰，「郭安迪」覺得：「連登班人真係好無賴……果（嗰）陣響度『鬥黃』，批鬥某啲黃店唔夠黃，程班長果陣好心派口罩，又鬧人地（哋）安排唔好，結果攪到人地（哋）心灰意冷，做到出年先走已經好畀面呢班『黃絲』……然後呢班人又將佢地（哋）做完嘅衰野（嘢）賴落熱狗度，嘩！講到自己好正義咁。」「Jennifer Lee」就插多句嘴：「程班長為十幾年來勞心勞（力）服務香港人，好多難關都特別用心，但換來一頓臭駡（罵）。我做（係）佢都返台灣。」

亦都有連登仔繼續爭鬥，「愛音まりあ」話：「講批鬥邊夠熱狗黎（嚟）。」「小黑咪」就覺得：「收皮啦熱狗，夠膽做唔敢認。」「（苦笑）」就學蟲泰講話：「熱狗咁都有得抹黑黃絲。」

不過都有黃絲另闢蹊徑，劍指「程班長」。「J_more人」就話：「老老實實佢個牛肉麵唔算好食。」「大師兄黎明」直頭講到：「啱架（㗎）啦，坐得又唔舒服，店員態度又差，啲野（嘢）食一般又細份，咁嘅環境嗌兩三樣野（嘢）都成舊（嚿）水，都係留返個舖位比（畀）良心店啦！」成單內訌大戲真係幾有睇頭。 ●香港文匯報記者 藍松山