黃妍自爆硬頸反叛一面

香港文匯報訊（記者 文芬）日前黃妍（Cath）作客TVB娛樂新聞台節目《StarTalk》，大談推出唱片《九道痕跡》感受。Cath說：「大家會覺得我係唱作歌手、文清、小清新，或者係斯文嘅人。透過呢張唱片，開始發現唔同面向嘅自己，好多時自己唔覺，係身邊人先至察覺到，經過呢個Project對自己認識更深！唱片裏面有九首歌九個面向，其中一個就係固執硬頸。我嘅底線係音樂，如果有人阻我唔畀我發展，即使係父母，我都會企得好硬！入行時，佢哋好反對，我會發佢哋脾氣，試過鬧交，因為佢哋都好硬頸，硬碰硬唔得，所以我會先冷靜，之後寫幾張紙嘅信畀爹哋表示不滿，而佢亦會回信。」

Cath表示家人影響自己深遠：「我會覺得屋企好嚴！好多規矩！由於家人反對做音樂，進入大學先開始做到自己想做嘅嘢，感覺好似放監嘅雀仔飛出去一樣！我發現自己有少少調皮反叛嘅性格，通常見到Don't Touch字句，我會特登去摸吓！寫住不准進入，我又會『裝』吓，好好奇裏面有乜嘢！讀中學嘅時候，爹哋打電話返屋企，我接電話時扮另外一個女人嘅聲，嚇到爹哋喺另一邊冇反應，靜咗！媽咪知道後叫我唔好玩爹哋！其實我真係曳，有啲小調皮！」