【貴圈真亂】「搣時潘」享樂式逃亡 續出寫真掠水

正所謂你慘住捱世界，我就歎住遊世界，攬炒派前區議員劉家衡老婆「搣時潘」潘書韻就係人辦。佢早排先高調話自己走佬去台灣，仲曬命要喺台灣買樓發展做生意，呢幾日仲喺Instagram出post，貼埋自己喺沙灘嘅泳衣照，真係享樂式逃亡第一人呀。但佢哋開口就有課金，唔怪得可以咁囂張呀。唔少黃絲就留言譏諷佢︰「流亡流到咁開心都係第一次見。」

「搣時潘」早排話要出「旅行寫真流亡日記」cap水，俾各路人馬圍插，叫佢唔好消費流亡二字，結果佢就改為「旅行寫真」照cap水。呢幾日，佢就貼出多張喺沙灘嘅泳衣照，意圖吸引一眾兵仔課金畀佢吃喝玩樂。

網民踢爆去咗關島歎世界

網民「犁牛」就根據張相嘅背景推測，話「搣時潘」應該係去咗關島。原來所謂去咗台灣都係想聲東擊西。網民「Nic Chung」就話，其實「搣時潘」去咗關島成個星期，「最新消息係已經入左（咗）英國。」

唔理佢去咗邊，佢呢副「享樂式逃亡」真係令黃絲好不滿。「陳秀珠」譏諷：「日日陽光與海灘！係咪佢老公幫佢影㗎？」「犁牛」回覆道：「可能契家佬，好亂」。「Ip Kei Tsun」狠批：「一般攬炒派係食人血饅頭，而『搣時潘』係『坐着一片血海』。」

「hohoho9817」揶揄：「兩公婆有手有腳唔正正經經搵份工，而係賣弄色情賣相，你真係我『偶像』呀。」「sycamore._」表示：「流亡流到咁開心都係第一次見。」

唔知「搣時潘」下次又會去邊度歎世界呢？只可以話，呢啲機會唔屬於一般黃絲嘅呢。

●香港文匯報記者 郭家好