香港文匯報訊（記者 李思穎）謝賢（四哥）、周聰昔日在粵語片年代合作無間，今次在林家棟監製的電影《殺出個黃昏》有機會再結片緣，前晚二人現身首映禮上雞啄唔斷。89歲的周聰上台時更興奮得險些絆倒，幸而獲家棟快手扶起，有驚無險，聰叔依然表現淡定，見到面前的四哥更是笑逐顏開，大讚已經84歲的四哥永遠都青春，永遠都擁有很多粉絲支持，氹得四哥笑到四萬咁口。至於片中女主角馮寶寶因疫情下，未能由大馬回港宣傳，但亦不忘拍片為劇組打氣。

四哥、周聰、林家棟、鍾雪瑩、林雪、顏子菲等有份參演演員前晚出席首映禮，何雁詩亦有老公鄭俊弘陪同到來。當問到四哥是否已先睹為快看過自己演出時，最愛講笑的他表示只看了自己有份演出的部分，其他的不用看，在旁的家棟便踢爆早前專誠將新片送到四哥的家中，見到四哥睇完之後嘴角上揚，四哥點頭說：「如果佢沒送來給我看過，我就不會來，總之唔滿意唔收貨，但沒想到會如此滿意，認識家棟時佢仲係仔，現在已經是演員同監製，做了大阿哥，我就四哥咋。」家棟笑說：「我犀利呀，開通宵嘅，叫7仔！記得當年演《新上海灘》舞台劇，我要扮四哥，見到四哥來探班時我戰戰兢兢不敢行近他身邊，沒料四哥行過來話仔扮好啲，然後便走開了，估不到大家多年後可以合作。」四哥聞言後百無禁忌說：「我專登唔死就是為了拍家棟，（家棟搵你會再拍？）我唔做了，會退休，我退休佢又要搵我，我唔退休佢又唔搵我。」家棟即說：「我剛搵佢時，佢都話退休，但望到我份合約之後便忍唔住，演戲就像中毒一樣。」問到四哥下一部希望「父子檔」合作？他拒絕謂：「唔好，唔想佢威晒，唔同佢拍，（有否見過女兒婷婷？）佢不在港，但之前已見過外孫女了。」

鍾雪瑩難忘四哥親切「萬歲」

而身在馬來西亞檳城的女主角馮寶寶，雖然因疫情未能回港，不過寶寶姐卻相當有心，特意在家拍片為劇組打氣：「我其實都好想返嚟同你哋一齊睇，希望將來特別嘅日子，可以情商戲院再放映，咁樣就可以同我啲朋友一齊睇，呢個係我嘅願望。我覺得自己能夠參與呢部戲係好興奮又好幸福，可以同『爹哋』謝賢再一次合作，記得第一次合作我係演佢個仔，呢一次合作就可以坐佢旁邊一齊傾偈。」寶寶姐更特別感謝家棟：「今次可以留下咁美好回憶，都要多謝監製林家棟，多謝你邀請我出任《殺出個黃昏》嘅女主角。」

至於片中跟四哥有不少對手戲的新人鍾雪瑩透露：「之前的優先場，見到觀眾反應好激烈，自己放下心頭大石。」說到跟四哥合作，她坦言起初只從旁觀察四哥，不敢行近，之後四哥要脫掉墨鏡演出，又主動同所有人傾偈，兼且請大家食蛋撻飲汽水，笑問有否被四哥罵？她表示沒有，但四哥會留意大家，又會讚他們比之前有進步，對她而言已經是定心丸。