演黃昏殺手入型入格獲好評 只要有工開就有寄託 謝賢開心繼續拍戲

香港文匯報訊（記者 阿祖）84歲謝賢（四哥）近日為本周四上映的電影《殺出個黃昏》做宣傳，四哥每次出來見人都一絲不苟，穿上一身白色衫褲襯黑色外套，照例戴墨鏡再要左耳戴大環形耳環，簡直走在潮流的尖端。拍照時，四哥自然地「謝賢」上身，不經意間單手插袋的甫士，觀眾心目中「型」足一世的四哥就呈現眼前。但今次在電影《殺出個黃昏》中，四哥完全放下身段，擺脫了「謝賢」，全程投入演一個落寞黃昏殺手，入型入格，並大獲好評，有資格問鼎金像獎最佳男主角。四哥表示會繼續拍戲，因有工開才有寄託，人就會開心。場地提供：Palco Ristorante （海港城）

對於再有自己的電影作品快將上映，四哥表示心情並不緊張，畢竟自己是靠這行搵食。四哥已很久沒拍戲，今次再出山，他笑言並非監製林家棟「氹」他，而是他自己「落疊」：「最初覺得個𡃁仔要拍我？結果拍出來又幾好，不過如果唔對路會感覺到，我會即走，我做咗演員咁耐，呃我唔到。」四哥在戲中有不少兩爺孫的感情戲，亦有部分動作戲，到底哪一場戲比較難忘？他笑說：「唔記得啦，拍完就忘記晒！我15歲就出來拍戲食這行飯到現在，作為終身職業，以前屋企阿爺、阿嫲、8兄弟姊妹都係靠我養。」

林家棟在旁笑言他簡直是一棵「搖錢樹」，四哥即稱：「我真係一個人養成家，但也不辛苦，也不是話大把錢，是有收入啦！」四哥坦言當年拍戲是賺到點錢，幾乎誰叫到都拍，一年拍了多少部戲，也多到忘記了，合作的女演員之多，他都不會記得清楚，記者在為他點名：嘉玲、蕭芳芳、南紅、江雪、陳寶珠、汪明荃、李司棋……最紅的都與他合作過，四哥笑道：「記唔到，拍完再見到，會問你係邊個，哈哈！」但相隔60年再度在《殺》片中合作的寶寶姐馮寶寶又如何？四哥幽默地說：「我家都唔記得佢個樣，諗唔到出來，但見到時又識喎，又知佢係邊個，太多嘢在腦裏面！」會記得女兒婷婷嗎？四哥搞笑說：「婷婷更加唔記得啦！」

質疑要否講「粗口」

提到四哥「型」足一世，以前拍戲都不願脫下墨鏡，就連在《情陷夜中環》一劇中，拍床上戲也穿西裝戴着墨鏡甚為「經典」，四哥即戲言：「嗰次唔知點解，可能個女仔唔係好靚啩！」當提他所拍的對手是張文慈，四哥補鑊說：「張文慈？我真係唔知，佢家個樣點我真係唔知，太耐無見，唔記得咗，唔通拍戲女主角個個都記得晒咩？真係唔知㗎！」

四哥在娛樂圈地位崇高，但家棟表示他一點都不難服侍，只要給他吃蛋撻、可樂和牛腩麵就搞掂，唯一最惡搞是要他在戲中被「孫女」鍾雪瑩激到講「粗口」，因為四哥有質疑是否需要講出「粗口」，結果是拍了兩個版本，最終選用了有「粗口」的版本，四哥表示自己也講得好自然，可能好入戲，講了也不知道。

四哥今次不顧昔日形象，完全投入演出落寞老人家如何面對人生未來，令人動容，被看好能夠在來屆香港電影金像獎爭做最佳男主角，他即反問：「唔係嘛？真係？」家棟取笑他不要扮謙虛，四哥說：「真係好好？可能佢畀咗藥我食！」家棟笑謂是「黃昏藥」。過去四哥只拿過金像獎及金紫荊的終身成就獎，問四哥會否也期望拿個最佳男主角獎？四哥笑說：「如果邊個攞，我就打邊個，邊個敢攞？」家棟即問他敢不敢拿這個獎？四哥笑笑口答：「我希望啦！」問到霆鋒已拿了最佳男主角，自己也拿到這個獎是否再無遺憾？四哥同是一句：「都希望啦！」

盛讚霆鋒好正直

至於四哥的新戲將與兒子霆鋒主演的《怒火》同期上映打對台，四哥表示也沒留意，拍完戲收工就不會記着。會否約霆鋒一齊睇戲？他帶笑說：「佢見到我都擰頭，不過阿仔好乖，無畀人有唔鍾意嘅地方被人話，乖得好犀利，我做到個榜樣，如果我又食煙、賭錢又媾女，他實老竇都唔認，阿仔真係一個好正直嘅人。」家棟笑問自己又怎樣？四哥答：「你唔係，唔識你，唔係好熟。」家棟裝作埋怨指四哥戲又拍完錢又收了就這樣：「好現實㗎電影圈，哈哈哈！」四哥即反擊：「你估佢會畀好多我？」家棟澄清自己貼錢出來給他做片酬，四哥不領情說：「或者你袋咗都未定，但我都會繼續再拍戲，開工會有寄託，如果唔係都唔知做咩，總之做人要開心，喂，就來『拉柴』啦，不過我都唔捨得咁快離開。」