不惜靠食血饅上位嘅攬炒派區議員對權力嘅慾望超乎一般人嘅想像。大埔區議會下環保、漁農、工商、食物及衞生委員會負責處理大埔商舖舖面延伸而引致阻街及環境衞生問題嘅工作小組主席、攬炒派嘅陳振哲（機場大叔）近日鬧同屬攬炒派大埔區議會副主席、環漁會主席劉勇威做事時涉嫌繞過工作小組，自把自為，覺得自己冇受到「尊重」，所以主動辭去工作小組職務。劉勇威亦不甘示弱，狠批陳振哲「一直橫行霸道，氣焰囂張的作風，真係好大的官威呀……」搞到一地花生。
陳振哲劈炮 劉勇威反擊
陳振哲日前喺facebook發帖稱，佢面對最無奈嘅阻力原來唔係喺議會外，而係出自其他攬炒派區議員，所以佢根據「基本政治倫理」辭去小組主席一職，「咁人哋就接番（返）手辦事啦！」、「懂得甚（什）麼是尊重嗎？」、「基本政治論（倫）理」。
原本唔知咩事，睇埋佢貼出嚟嘅辭職信先知。佢就話係因為覺得工作小組入面有「個別成員」一直持唔合作態度，繞過工作小組做嘢，加上6月7日環漁會主席劉勇威亦繞過工作小組，喺未知會工作小組嘅情況下直接處理有關事務，令佢認為自己被架空，冇晒面，所以發老脾辭職唔做呢個（工作小組）主席。
佢仲同傳媒話，本身都同各政府部門開會溝通當區有關問題，但喺唔知情之下，劉勇威電郵大家到場視察，而呢個行為本身代表對方有意收回職權，又質疑委員會主席如果想自行跟進議題，工作小組好難運作，又話如果食環署約劉勇威，劉應向對方說明有專責小組負責。
面對陳振哲嘅指控，劉勇威就好直白哋狠批陳振哲「到底係邊個唔尊重邊個」，「吓，乜原來而（）家委員會主席做事要請示屬會『小組主席大人』先做得？」
佢之後仲爆大鑊，話陳振哲當日擔任大埔區議會阻街小組主席期間，竟然可以喺從未開過一次會議嘅情況下，去信讚賞食環署跟進阻街行為，又批評佢用小組主席身份，迫自己撤回叫其他人去大埔墟視察嘅信件，「你個小組要上委員會匯報㗎，唔係你大哂（晒）的（㗎）。一直橫行霸道，氣焰囂張的作風，真係好大的官威呀。」
網民「Hardwood Chunk」就留言話：「睇左（咗）篇報導（道），的確係你（劉勇威）繞過左（咗）工作小姐，劉生，呢個客觀陳述是否正確？」劉勇威反駁說：「如你所言如區議會大會處理環保問題就是繞過了環漁會而不能討論，甚至可以強逼（迫）大會主席不給予討論，要求主席撤回文件？我認為此說法十分荒謬。」
李志宏加入戰團嘲「大叔」
攬炒派沙田區議員李志宏就留言揶揄：「區議會大會都繞（過）埋喎，不如同（繞過）埋民政（總）署講？」唔少網民亦都覺得係陳振哲自己做騷。「Yynam Lam」問：「委員會大定小組大？小組竟然可以指揮委員會做嘢？呢個白頭老（佬）真系（係）勁！」「Corrcian Chiu」說：「白頭佬都唔係第一日扮大佬，搞到其他區既（嘅）人都知。」●香港文匯報記者 鄭治祖
0
已點過讚
0 / 255