《逆天奇案》收視報捷 杜之克辭職 睇展鵬 馮盈盈床戲 林夏薇好難受

香港文匯報訊（記者 梁靜儀）無綫自今年邀曾志偉和王祖藍回巢出任高層後，管理層亦不停有變動，繼董事局副主席兼行政總裁李寶安宣告退休，星夢行政總裁何哲圖及老婆余詠珊相繼離任後，昨日又再傳出副總經理（戲劇製作及節目）杜之克已遞信辭職，杜之克之前一直都有出席劇集《逆天奇案》宣傳活動，昨日則未有現身。劇中陳展鵬和馮盈盈與的床上戲播出引起熱議。林夏薇揚言自己睇完也好難受，她劇透將會有多場爆喊場面，並難忘聖誕期間中環拍喊戲，有途人見狀竟然走上前跟她講「Merry Christmas」。

昨日陳展鵬、林夏薇、馮盈盈、黃智賢、蔣祖曼及劉佩玥等出席劇集《逆天奇案》宣傳 ，劇集總監製劉家豪公布第二十一集七天跨平台總收視28點 ，再奪「2021年兩線劇集單集收視冠軍」，收視報捷眾演員都起哄要原班人馬開拍續集。

陳展鵬和林夏薇被問到是否知道杜之克離職一事？展鵬說：「以往如果有高層離職，公司都會喺內部發出短訊通知大家，但係家仲未收到通知，所以我都未知情況，唔發表住。」

問到可擔心影響開拍續集？展鵬坦言劇集有好成績，加上是自己多年來第一套合拍劇，而且劇集在內地亦都受歡迎，當然想原班人馬拍續集，最重要睇觀眾反應。林夏薇亦稱希望能順利開拍續集，但作為演員都是聽從公司安排，收到劇本做好本分。問到有信心收視能衝破30點嗎？展鵬笑說：「當然希望衝破30點啦，家呢個環境，30點發夢就有。」

另外，提到日前播映一集，展鵬發現酒醉後躺在床上的女人並非自己的另一半，展鵬笑說：「如果真係有個女人瞓喺隔籬，有乜理由乜都唔知？酒醉都有三分醒，一定要喺情理之內。（太太單文柔可有收看？）太太睇咗嫌少，覺得呢場戲好吊癮。」

林夏薇中環拍喊戲途人送祝福

林夏薇表示雖然知道劇情，但個心都好難受，老公都有陪她收看，睇都睇到好心噏，而她更要彈琴來發洩。她透露稍後會有多場爆喊場面，其中最難忘一幕是在中環人來人往的馬路中心爆喊，更喊到眼腫，適逢拍攝期間正值聖誕節，有途人見狀竟然走上前跟她講「Merry Christmas」，跟劇中情節有好大反差。

馮盈盈對於被網民稱為「國民妖精」， 她笑言初時以為是褒義，因為一般妖精都是好可愛、好活潑 ，但原來是形容她的角色，她又笑說：「 成功咗，編劇、導演成功咗，自己從中叨咗啲光，有好過冇，我都有個稱號，好嘢。」

馮盈盈認有打包鮑魚

劇中盈盈與展鵬的床上戲已播出，盈盈笑言開心該場戲帶挈她成為內地熱搜及粉絲量上升， 問到可想帶挈她接內地工作？盈盈稱沒想過。

提到盛傳高層杜之克辭職，盈盈說：「前日睇報道見到，但自己只是小職員，同杜生好少接觸。（可擔心影響稍後開拍以選美為題材的新劇？） 套劇都未開怕， 自己收到嘅消息都唔係太多， 做咩角色都未知 ，作為演員做好工作就得， 都係平常心，我連《逆天》有冇續集都未知 ，第一劇集仲未播完，如果到結局變咗『國民妖怪』就變咗科幻劇。」

對於有指她拍《 big big shop感謝祭》帶食物膠盒裝拍攝用的道具鮑魚，對於被指又食又拎，盈盈澄清資料是錯的 ：「因為應該係拍《天天開運王》，唔係拍《 big big shop感謝祭》， 我唔會當住咁多人面前拎貨，我唔會咁樣做。（有冇拎膠盒裝嘢食？）係呀， 因為每次都煮好多，如果倒咗就好浪費 ，做人要有衣食，當時我未食素，有拎雞、鵝、鮑魚，工作人員都有拎。」 問到以後拍節目會否不敢再打包食物？盈盈坦言不會：「如果係冇做錯，為咗環保，我唔會因為人哋講而唔拎，最多以後拎菜、蛋糕、生果、水，唔拎鮑魚，留返畀大家。」