政治上腦嘅黃絲連搵食都要分顏色，成日叫人抵制俾佢哋藍標嘅商戶，盲撐所謂「黃店」。不過，俾唔少黃絲視為「子華神」嘅香港棟篤笑始祖黃子華，日前卻幫咗佢哋眼中嘅藍店賣廣告，仲喺廣告片中大騷招牌啜核金句，搞到佢哋啼笑皆非。面對信奉嘅男神「背叛」，唔少「手足」卻引用返子華嘅金句「搵食啫！犯法呀？」，覺得應該照樣支持偶像，搞到被譏講一套做一套，但都有唔少黃絲嬲爆咁鬧子華「扮黃」。
黃子華日前為外送平台做代言，仲喺新推出嘅廣告中大騷「搵食啫，唔好搵自己笨」等精警金句。唔少網民睇完都話拍枱叫好，更有唔少「同路人」轉載片段，大讚廣告似足迷你棟篤笑。好似「才子」陶傑就喺facebook發帖話：「只拍出這段有藝術和舞台意味的廣告，證明香港最終一定有希望。」成日惡搞抹黑政府嘅網媒《100毛》創辦人林日曦亦喺fb轉載廣告片段，仲幫埋口賣廣告，話自己都有用呢個外送平台，仲同網民講：「條片有子華神，你哋自然就會用個App㗎啦。」
有黃絲鬧：呢條垃圾扮黃
事實上，呢間外送平台卻因為曾經喺俾黃絲標藍嘅電視媒體落過廣告，同埋同藍店合作，早已俾班黃絲標藍。網民「眼鏡蛇」就喺「連登」以「大家幾時有心理準備抵制黃子華？」為題發帖。「比啲野我睇下」更留言鬧子華：「呢條垃圾扮黃，吹到要賣樓拍戲，水×我地（哋）班黃手joke（足）入場睇套垃圾。」
不過，原來黃絲所謂嘅「原則」都只係得把口，偶像搵食最緊要，黃藍都可以放一邊。好似「通街都係處」就留言話唔應該用顏色批鬥偶像：「如果要非黑即白嘅，古天樂一直同中資合拍片，有幫中資藍紅底公司賣廣告，係咪又要批鬥？」
「眼鏡蛇」則認為「手足」唔應該雙重標準，只針對日前為藍店賣廣告嘅Mirror：「同一性質嘅事，佢哋選擇性失明純粹想× mirror，你就知呢班人幾咁垃圾。」「老而不死是為賊」亦叫「手足」諗吓：「咁係咪政客以外都唔需要批評，咁係咪唔反TVB藝人啦？」
對於班黃絲家先識反思係咪應該將日常生活政治化，有網民就笑班黃絲亂咁標藍。好似「4位數字會員」就指出呢間外送平台只係歐洲企業：「熊貓德國公司，邊到（度）『紅底』？」「一息尚存壓榨到底」都話對黃圈心灰已（意）冷：「退咗黃，唔好煩，自己鍾意用咩App就咩App，鍾意食咩就食咩。」
唔少「手足」就話再分黃藍只係攞苦嚟辛。「老而不死是為賊」話：「最簡單飲水都唔知點算。」「你認真就輸了」就揶揄班黃絲：「買棵菜都要問下菜販支唔反（支）持『光復香港』。」 ●香港文匯報記者 黃書蘭
0
已點過讚
0 / 255