黃圈啲呃錢藉口連最盲目嘅黃絲都唔落疊？聲稱用嚟撐起黃圈嘅手機應用程式「懲罰Mee」自推出以嚟劣評多多，唔止經常斷線、無法留言、甚至被質疑偏袒大店，但「懲罰Mee」近日就喺facebook出post死撐，話個app咁多問題都係因為網民反應高於預期，導致伺服器多次過載喎，又聲稱上周開放畀用戶用積分換主題T恤嘅活動反應太過熱烈，喺「群情洶湧」嘅情況下決定加印T恤，並會喺自稱「良心」網購平台，即早前就傳出壓榨員工嘅「光時」售賣，搞到一眾黃絲用戶發晒火，質疑「懲罰Mee」根本冇諗過改善程式素質同回饋用戶，純粹諗住賺錢。

狠批漏洞多 猛氹人幫襯

「懲罰Mee」近日出post吹噓自己開發個App幾咁受歡迎，又要學人搞儲「MEE分」，之後又話上周畀用戶用積分換領嘅「Stay With HK, Stay With MEE」主題T恤「幾分鐘都冇就換曬（晒）」，喺「群情洶湧嘅情況底下」決定加印，並會喺「光時」發售，仲呼籲大家快啲搶購同幫襯「光時」喎。

講到咁勁，但網民「On Lee」就喺fb群組「沙田之友」發帖，狠批「懲罰Mee」漏洞多多，包括斷線、無法留言、地圖範圍細，冇地標、訊號弱、積分好耐先更新、對大小型黃店有差別待遇……真係多到數唔晒。佢更批評最近用積分換T恤嘅活動：「衫得少少怎（點）分、不如唔好送！」

「YF Lui」就叫帖主睇開啲：「我直頭開唔到個app……更新完都開唔到，估計寫呢個app出嚟嘅人有機會係冇錢收/義工價咁收，就算了。」但「Cong Xuan」就話：「樓（帖）主真天真，大店出左（咗）幾多？你又出左（咗）幾多先？」

懶理投訴 網民貼死機相抗議

最令人愕然嘅係「懲罰Mee」嘅解畫方法：佢哋近日喺fb回應個app漏洞百出嘅投訴嗰陣，竟然理直氣壯咁話：「這次對於『Mee』App 的反應及規模比預期中更大，導致伺服器曾多次出現過載。」

對「懲罰Mee」質素咁差仲可以自吹自擂，唔少網民紛紛貼出個App load極都load唔到嘅畫面抗議，「Chan Ho Lam」就好火滾咁話：「想賺錢就賺錢啦，收咗咁多黃店廣告費但個app又咁鬼慢，叫人儲分但又換唔到tee，宜（𠵱）家仲好意思叫人去『光時』自己畀錢搶購，好心啦，都唔求你會有咩回贈，賺咗咁多錢就改善下（吓）個app，否則想俾你呃都心不甘情不願。」

●香港文匯報記者 雨航