「黃App」疑收廣告錢 跣「同道」食偽黃店

貨不對辦？有錢賺咪得囉。話說早前有人整咗個聲稱係用嚟撐起黃色經濟圈嘅手機應用程式「懲罰Mee」，大批黃絲一窩蜂下載，諗住跟住個清單幫襯就實冇死。點知近日有網民喺facebook大呻中伏，事關個app竟然推薦佢去一個冇任何文宣，仲「叫人掃描『安心出行』」二維碼嘅偽黃店，唔少黃絲亦大呻有相同經驗，紛紛懷疑呢個app表面上就話幫黃圈，實質收咗錢就會賣廣告，所以先會跣啲「手足」幫襯偽黃店。

呻無「連豬」裝飾 要掃「安心」入店

黃絲fb群組「馬鞍山之友@36着之走為上着」嘅管理員「Chan Eric」近日貼文大呻中伏，事關佢用「懲罰Mee」呢個app搵餐廳嗰陣，個app竟然推介咗間假黃店畀佢，呢間舖嘅電視會播黃絲認為係藍媒嘅TVB，會叫客人掃黃絲覺得用嚟「竊取個人資料」嘅「安心出行」二維碼，舖內亦都冇任何文宣，更加見唔到「Pepe蛙」「連豬」呢啲黑暴卡通嘅裝飾。

唔少黃絲網民都好有共鳴，大呻食完呢間偽黃店後中伏。「Chan Eric」喺另一黃圈app「和你pay」上發現，呢間舖竟然都被標為黃店。有網民就喺個app上面留言，批評呢間嘢完全唔似黃店。

「FDNOL」就質疑：「黃店但海報用『殘體字』？成張海報都係『支那』風格。」「Summer」亦搲晒頭：「網絡上沒有任何資料，為什麼是黃店？」「Chan Ho Lam」就懷疑：「係咪啲app收咗錢賣廣告咋？有錢點會唔收？以後『mee』『和你pay』呢啲app都係唔好亂信。」

●香港文匯報記者 雨航