香港文匯報訊（記者 黃恆諾）箍牙是專門的牙科療程，不光是箍牙咁簡單，還牽一髮動全身。修復齒科專科醫生朱祖順指出，箍牙是全方位的療程，前期必須檢查及修復所有牙科問題，才能進行箍牙，否則原有的蛀牙、牙骹痛等問題會急劇惡化，做錯一步便可能毀掉整排牙齒。

「箍死」定箍蛀牙？ 齋靠相睇唔出

朱祖順接受香港文匯報訪問時表示，牙醫在箍牙療程開始前已經要為病人檢查牙肉有沒有牙周袋、有沒有蛀牙或牙骹痛，或面部不對稱等問題，「先要處理好才能照X光片和造牙模才開始箍牙程序，未清理原有牙齒問題便箍牙有可能令問題進一步惡化，例如本身有蛀牙未補就戴住牙箍會加快蛀牙速度，因為箍住啲爛牙，食物24小時塞喺個箍裡面，口水冇辦法沖走。」

自助箍牙產品開發商雖然有提供遙距檢查，由用家自行拍照供牙醫透過視像跟進，朱祖順質疑做法的可靠性，「（遙距）好難睇，返到嚟（覆診）你可以教佢大牙咬成點、門牙點咬，做咬口分析，但得張相睇唔到佢咬得好唔好。唔同位都要慢慢檢查清楚，好似蛀牙，可能係相片以外位置蛀，牙醫根本睇唔到。」

雖然部分開發商會安排用家面見香港的註冊牙醫最少3次，但朱祖順認為該安排的宣傳效用大於臨床作用，批評以市場推廣角度凌駕臨床安全十分危險，「我哋唔會好輕鬆咁話睇幾多次就得，有事就應該要睇，佢哋一早同病人講只是睇幾多次就得，為病人植入療程簡單諗法，有事可以睇都未必識去。」

朱祖順續稱，部分堅毅的病人可能會認為箍牙不適是正常，一直死忍，最終可能令牙齒「箍死」，「只是用個箍將啲牙迫開，令牙骨收縮，牙齒會變鬆，太鬆可能食唔到嘢，甚至脫落！」他警告，牙齒只需數個月就可能造成不可逆轉的創傷，一旦牙齒被「箍死」，牙醫基本上亦沒有方法可以補救，「骨頭一收縮就好難生番，有時根本冇得處理，只能建議病人唔好再戴個牙箍，睇吓佢會唔會自己生返好啲，手術都未必救到。」