【貴圈真亂】開檔變開拖？ 女「手足」挨打入院

「軍火佬」疑曾性騷擾傷者 多間黃店聲討放上「連登」公審

黃圈𠵱家對住「同路人」都會行私刑「私了」？話說黃圈喺復活節期間搞咗個「窮L市集」，吸引多名黃店檔主聚集擺檔，其中一名檔主「軍火佬」就喺市集直播宣傳，點知佢去到另一檔由「hk9cake」同「Yellowbirds.hk」合租嘅檔口嗰陣，就疑似性騷擾兩名睇檔嘅女「手足」，話人哋「着得衫多唔夠靚」，事後網上就傳出其中一名女「手足」俾人打到周身傷要入醫院嘅消息，而僱用該名女「手足」嘅黃店「Aromafairy」即刻聯同「hk9cake」同「Yellowbirds.hk」聲討「軍火佬」，事件仲被擺上「連登」公審。其實呢啲口同鼻拗嘅嘢喺黃圈已經多不勝數，只係冇諗過連開檔賣嘢都可以搞出咁大件事。●香港文匯報記者 雨航

自稱「出冊手足」嘅「Aromafairy」店主4月3日喺Instagram發文，話嗰個檔位原來係由「hk9cake」同「Yellowbirds.hk」借畀佢賣香油，而涉事兩位女「手足」當日正係以受薪形式幫手睇檔，結果女「手足」俾「軍火佬」騷擾完後就打電話畀佢哭訴。

「Aromafairy」話大家喺直播見到嘅只係冰山一角，「軍火佬」喺鏡頭後不斷單單打打話人偽黃、「呀（阿）豬呀（阿）狗都自己係『手足』」，又人身攻擊兩位睇檔女「手足」，仲一腳踢埋佢哋個檔口。「軍火佬」其後回覆話：「又係你哋自己話要拎張出閘紙出嚟當『手足』，唔該你哋搞清楚你哋自己放嗰啲咩貼（帖）啦。」

社交媒體貼照 幾乎全身傷痕

至4月6日凌晨，「Aromafairy」「hk9cake」就喺社交媒體貼出其中一名涉事女「手足」入院嘅相同埋傷勢，幾乎全身都係傷痕，但就見唔到樣，唔知到底係唔係直播條片入面嘅女「手足」，而「Yellowbirds.hk」就質疑件事係「軍火佬」搞出嚟。

該名女「手足」被打嘅事即刻傳遍「連登」，「軍火佬」就矢口否認搵人打女「手足」：「我揾（搵）人打妹妹你都講得出，請你認清事實先，你地（哋）有幾多野（嘢）/事喺身，要玩野（嘢）我咩都陪你地（哋）。」

「白影」撐「軍火佬」：唔好迫我做嘢

自稱「獨立記者」嘅「白影」亦喺fb開post撐「軍火佬」，話自己夠膽用條命擔保「軍火佬」唔會做啲咁嘅嘢，又有少少恐嚇意味咁話：「致某方，唔好迫我要出手查你地（哋）。一來我休養中，唔想做野（嘢）；二來我出手做得嘅，都無（冇）乜好下場。」

幫助該名女「手足」嗰幾間黃店其後代女「手足」發聲明，女「手足」好委屈咁話：「我真係好痛其實。但我唔嬲，我淨（剩）係想冇下一次，幫我既（嘅）人忍一忍，唔希望大家有事。」仲叫大家「以此為鑒，勿鬥黃」𠻹。

可能呢啲事已經見得太多，有網民睇完就得啖笑，好似「超級撒亞人神」就話：「正啊，快啲開打！」「孩子飛飛」就分析：「呢班人個特點就係，佢攪（搞）×人就天公地道，當自己理虧比（俾）人×果（嗰）陣就成班盲粉×人不分化不割蓆（席）。」

「賤大媽（隔夜）」就批評「白影」：「呢個圈真係好多呢啲真白卡痴（黐）線佬，用埋d（啲）黑社會口吻係（喺）到（度）恐嚇人，乜×野（嘢）逼佢出手……『軍火佬』平時做啲乜同佢有無（冇）做過今次件事根本無關，真係證明黃都唔係一定好人黎（嚟），極多呢啲有病既（嘅）中坑。」