香港文匯報訊（記者 文芬）由孫慧雪、關心妍、張美妮一齊主持的網上節目「靚媽圍爐」已經播到第四集，今次3位靚媽圍埋一齊大爆「陪月」騎呢事。

節目中，阿雪先分享佢朋友試過請金牌陪月，成8萬蚊一個月，點知一點都「唔金牌」，仲要重感冒食藥後，鎖房門同個B喺房瞓，拍門兩個鐘冇人應，結果佢朋友即刻炒咗佢。

至於阿雪自己嘅陪月完約後，就請咗一位姨姨來湊BB，點知個姨姨非常之咁特別：「佢唔知點解好鐘意唔戴胸圍，又經常喺BB房只係着住條內褲行來行去……又試過個姨姨聽到我老公叫佢，突然喺浴室只係包條毛巾衝出來問佢咩事，嚇到我老公即刻話『冇嘢喇』掉頭走。」

最後阿雪更指，揀陪月要睇身形，「如果你生個巨B似我個仔咁，最好請個高大少少有力嘅陪月姐姐，我生嗰時，分兩更請，一個日更一個夜更，日更嗰個陪月身形好細粒，我個仔出名巨B，所以試過兩次佢真係唔夠力，同BB沖涼時差啲連人帶B跌低，好彩我衝過去扶住佢哋兩個。」

張美妮就非常之「肉赤」，用9萬蚊請咗個唔夾的陪月，只係做了一個月。她說：「其實係5萬幾蚊一個月，24小時陪月，但我一簽，簽了兩個月，最終唔夾，唔到一個月已經用唔到落去，由於已簽合約，結果埋單9萬蚊只係工作了一個月。」

張美妮謂，同陪月姐姐唔夾，主要係佢諗住即使辛苦啲都埋身餵人奶，但陪月就覺得「半夜三更你最好泵定奶放喺度」，等佢方便餵而唔係佢要半夜坐喺度等媽媽餵成個幾鐘，仲向佢老公投訴話佢太緊張，唔泵奶備用，搞到美妮試過委屈爆喊。