千錯萬錯都一定唔會係黃絲嘅錯。話說海事處為咗防疫，自3月1日起封閉俗稱西環碼頭嘅西環公眾貨運裝卸區，中西區區議員葉錦龍就即刻撲出嚟鬧海事處冇諮詢過區議會，仲話自己知道措施實施得，已經分別搵咗海事處同民政專員，要求佢哋暫緩相關措施，但仍然遭到拒絕，睇落似乎想向黃絲證明自己有做嘢喎。不過，「連登」同facebook專頁「西環變幻時」都有網民話，疫情期間西環碼頭仍然聚集咗唔少嚟「打卡」嘅市民，而且經常留低垃圾，所以海事處最終先會唔准公眾進入碼頭，叫葉錦龍唔好未搞清楚就亂咁鬧人。
西環碼頭自3月1日起只准持有效安全卡或工作證嘅人進入，葉錦龍見狀即刻喺fb發帖，聲稱海事處喺未有諮詢當區區議員同區議會嘅情況下，單方面推行影響區內居民福祉嘅措施係不能接受喎。
譏葉「碼頭閂門使鬼諮詢你」
不過，唔少網民都對海事處封閉碼頭表示理解，好似「黃型型」就話：「起卸區係工作地方，唔係公園！車來車往好危險……」「李露眉」仲駁返葉錦龍轉頭：「一直都係海事處地方，（）家人地（哋）關自己度（道）門洗（使）鬼諮詢你呀？」
「連登」同fb專頁「西環變幻時」亦分別有網民指出，碼頭一直都係船主落貨做生意嘅地方，但自從幾年前網上有人大力推薦西環碼頭做影相「打卡」嘅景點後就唔同晒，去年疫情爆發，唔少學生不但冇留喺屋企，反而迫爆晒成個西環碼頭，仲開始出現有人爬貨櫃、野餐留低垃圾、偷竊影響船運、縱火、放四軸飛行器，狗隻失足墮海等事件，令到好多船主都非常不滿，街坊亦都覺得碼頭變得烏煙瘴氣，所以海事處先會封閉碼頭，該網民亦平心靜氣咁問大家：「就係咁大家思考一下，自己成日話大陸（內地）細佬（路）喺地鐵大堂屙尿（小便），點解唔諗下（吓）自己冇執走垃圾同埋毀壞私人財產。」
唔少網民旋即都話自己「高質素」，係其他「低質素」嘅香港人搞到西環碼頭「變晒質」，「Rocky Lam」更話：「十年前會自己一個去飲下（吓）啤酒，靜下（吓），變景點之後已經冇去，讚（贊）成封（閉）佢」「Tai Man Chan」就回覆寸佢：「那個自我太大，自己永遠冇問題，有問題永遠都係別人。」
原名葉鍵濠的商業電台節目主持健吾亦加把口：「聽講香港人唔鬧得。鬧佢會問你做乜鬧佢。明明係一個『不義政權』立出嚟嘅『惡法』，公共空間就係唔應該有規管，點知大家『左膠』唔去捍衛公共空間，仲要話使用公共空間嘅人搞到今時今日咁，佢哋係唔係blame the victim？」●香港文匯報記者 雨航
0
已點過讚
0 / 255