Ben Sir「糧支」大過天 撐中資激嬲「黃絲」

「黃絲KOL」撐得嘅一定係「黃」？原來未必㗎，睇吓最近有啲出位嘅「黃絲KOL」成日都宣揚要撐乜撐物，但到頭來唔少係嚟自中資嘅公司或產品，搞到成班「黃絲」發現後紛紛割席表忠貞。但係講到尾，「黃絲KOL」都要搵兩餐開飯，即係「糧支」始終大過天囉。

話說社交媒體fb專頁「11.26爆買日｜懲罰師出動」早前就發文講「Ben Sir介紹唔一定係黃」。原來佢哋發現一直「撐黃」嘅Ben Sir （歐陽偉豪）近日拍咗個廣告，喺各大媒體上介紹一個「本土」嘅虛擬銀行。咁Ben Sir撐「黃」喎，介紹得嘅都一定係「黃」啦！點知有網民就發現，原來嗰間公司嘅CEO除咗現職多個政府轄下委員會，仲曾經做過深圳市消委會委員。唔單止呀，間公司嘅背後投資者仲包括阿里巴巴、中國建設銀行等多個中資企業。

 前「香港眾志」成員廖偉濂就分享咗呢個帖，仲話「Ben Sir 介紹唔一定係黃」。

網民幫口即變箭靶

網民「Janis Tree」就幫Ben Sir辯護：「銀行就一定有中資，肯用『黃』嘅KOL都算係咁啦。」不過，佢呢番言論隨即被人批評：「換句話說，如果微信支付搵黃KOL 賣廣告，大家就應該放低戒心提交個人資料申請使用？」睇嚟網民開始對於Ben Sir呢個「黃絲KOL」推介嘅嘢都有所保留咁喎。

「Chow Fiwai」就留言四隻大字「收人錢財」，唔知係咪話緊Ben Sir收得人錢，就算唔係「黃色經濟圈」嘅嘢都會照推介畀一班「同路人」用呢？

 呢個帖子喺一日唔夠就有266個轉帖，睇嚟一班「黃絲」都急住同大家報料，避免因為信錯Ben Sir而中伏！

■香港文匯報記者 倪思言