新一個馬季開鑼之後,眨吓眼,日以繼夜經已完成四次賽事,早前新冠肺炎疫情再度爆發,無可避免沖淡咗今個馬季開鑼前嘅氣氛,傳統嘅季前試閘嘉年華同騎師競跑等活動被逼取消,開鑼日之後亦繼續上季限制入場安排,投注站亦局部開放受注,但係公眾馬迷上個馬季尾都已經習慣晒,接受現時無得入場同靠網上投注嘅新常態。新冠肺炎疫情反反覆覆確實難料,急都急唔嚟,馬會當然想快快恢復往時正常運作,喺賽日重開所有投注站接受投注。不過,喺避免人群聚集嘅防疫大前提下,都係謹慎啲好,馬迷朋友與其呻投注站唔係經常開放,買馬唔方便,不如花少少時間攪掂個投注戶口,臨場有心水就唔使煩。由上季疫情爆發至今,馬會喺防疫方面做咗好多嘢,除咗喺公眾層面,喺賽馬相關工作人員方面都非常嚴格,馬會規定全體騎師每個禮拜都要做定期病毒檢測。馬會亦規定馬房工作人員做檢測,據聞最近更加密咗檢測次數,唯一唔同係無騎師覆檢咁頻密。無論對馬會或者公眾馬迷嚟講,最重要可能係賽事如期舉行,上季係一個成功經驗,香港係疫情下全世界唯一能夠馬照跑嘅地方,能夠做得到背後當然有好多防疫配套支援,計落馬會付出都有回報,匯合彩池投注額有顯著上升,數碼投注工具喺短短時間大幅普及,令更多馬迷接受。近日疫情稍回落,馬會方面真係唔使心急,最怕稍稍放鬆就前功盡廢,馬場爆發確診個案嘅後果,可以肯定係賽事全面暫停。

另外,截至九月為止的最新浪琴表世界馬匹排名於日前公布,排第一是高多芬旗下英國五歲怪獸馬「既成事實」,此駒於早前一級賽朱德望國際錦標,大勝三個馬位,實力得到進一步證明,國際評分由一二七分升至一三○分,不過此駒剛周六轉戰愛爾蘭李奧柏馬場,角逐二千米一級賽愛爾蘭冠軍錦標遇上滑鐵盧,面對上次落後佢三馬位嘅古摩亞賽駒「變魔術」,以為實食無黐牙,點知今次後駒喺許覺能胯下咬住全球一哥嚟跑,末段都鬥贏對手成功復仇,贏到呢場G1之餘,同時亦助練馬師岳伯仁第九度贏出呢場賽事。英國三歲馬「海上宮殿」以一二六分躍升至第二位,歷來五戰全勝,包括今年贏出兩項國際一級賽聖詹姆士皇宮錦標及法國傑克莫華大賽。剛勝出法國隆尚磨坊大賽的「柏斯國君」、雅士谷金盃及古活金盃冠軍「弦樂器」及目前美國最佳三歲雄馬Tiz The Law,同得一二五分並列第三位。至於香港有三駒居前列,「美麗傳承」評分維持一二二分,但由第七跌至十五位;應屆香港馬王「時時精綵」以及「旺蝦王」均得一二○分,一齊排在第二十六位。