筆是機場/稀思路
APEC會議日前喺深圳召開,亞太各國嘅重量級政商界人士齊聚深圳,一同商討亞太甚至世界未來。美國總統特朗普、俄羅斯總統普京都有到深圳,仲展開世紀級中俄美元首會晤。雖然存在感並不高,但其實日本首相高市早苗都有到深圳,稀思路留意到,有聲音認為中國對高市早苗「招呼唔好」,甚至稱為「降格招待」,筆者想問,日本本身唔係超級大國或者頂級國家,何來「招呼唔好」、「降格招待」呢?
18日下午,高市早苗抵達深圳國際機場,準備參加APEC領導人非正式會議,中方派出外交部禮賓大使章啟月到場接機,兩人寒暄幾句後,高市早苗就喺儀仗隊歡迎下坐車離開。
如果同個別國家比較,例如係美國、俄羅斯等,首先係日本同其他國家,根本唔係同一個級數,要寄望得到「好高」規格待遇,先可能係唔合理。讀者們可以睇下今年9月嘅新聞,高市早苗訪美,落機時場面冷清,更出現咗一幕經典場面,就係高市早苗「向空氣揮手」,如果招待規格「唔夠高」係問題,套用呢個邏輯,日本嘅「老大哥」美國,係咪完全無視佢?相關新聞依家仲好容易睇到,讀者們想睇,上網搜下「高市早苗」「向空氣揮手」就有。
除咗國家實力,筆者甚至認為,中國對於招待日本嘅方式,算係十分之好。點解咁講,自高市早苗上台以來,基本上就對中國充滿敵意,上台無耐就公開話「台灣有事即係日本有事」,想擴軍,想賣軍備,甚至製造「中國脅迫」之論。一個嚴重右傾、有反中思想嘅日本首相,人嚟到中國,中國仲作出禮貌嘅招待,仲想點?難道要套用電影對白,「駛唔駛請埋你食糖水?」
從種種跡象睇嚟,高市早苗到中國,想擺出友好姿態,但中日關係嘅底因,係日本嚴重地冒犯咗中國,台灣係中國一部分,唔關高市早苗或日本事;新中國成立以來,都唔會惹事,但高市早苗在內嘅右傾政客,就透過挑動矛盾嚟爭取支持。如果高市早苗真係想同中國修補關係,公開撤回「台灣有事」言論,向中國致歉,其實先係有誠意。
依家中日關係緊張,據報,日本國內依家有唔少重要企業,正因為欠缺稀土而面臨停產,筆者認為,基本上成個局面都係高市早苗一手促成。喺廿一世紀,世界各國應該加強合作、解決分歧,但高市早苗思想仲停留喺幾十年前,靠炒作等維持支持。對外,相信大家都見到高市早苗嘅外交政策唔掂;對內,日本經濟、貨幣以至產業都搞唔掂。如果日本要同中國修補關係,又如果高市早苗願意醒覺,就應該正視自己嘅問題,而唔係冒犯完中國當冇事發生,剩係對外聲稱中日之間有問題「未解決」。
評論( 0 )
0 / 255