都年尾仲有月餅賣？深水埗老餅店四季常備惹熱議 街坊力撐：紅豆月餅真係返唔到轉頭！

深水埗臨近年尾竟然仲有新鮮月餅買？近日有網民喺社交平台「香港茶餐廳及美食關注組」出Post，大表驚訝：「都年尾啦，深水埗仲有月餅賣！但係好平！」呢個貼文即刻引起大批街坊熱議，仲出現咗兩極化嘅討論。

唔少網民睇到即時起疑，紛紛留言質疑：「會唔會係中秋節剩低嘅過期貨呀？」、「擺到依家咁耐，好容易發霉喎！」、「中秋嗰陣賣成四十蚊一個，依家仲邊有人敢食？」

不過，亦有大批熟客同「識食之人」出嚟平反，力撐呢間位於元州街嘅麵包西餅店向來係一年四季都供應月餅，品質有保證。有擁躉大讚：「呢間真係好食，舊年試過一次就返唔到轉頭」、「佢哋嘅紅豆月餅真係一絕」。同時亦有一班搞笑網民突破盲腸，笑言：「換個角度諗，咁快就可以試定出年嘅月餅，四十蚊絕對超值！」、「其實農曆每個月初一、十五個月亮都咁圓，不如以後規定逢初一、十五都要食月餅慶祝啦！」