車婉婉談曾志偉批評收視論 稱前輩經驗寶貴：對我是很大鼓勵

香港文匯報訊（記者 梁靜儀）車婉婉、樊亦敏、李茵彤、羅毓儀、甄敏芳、穎喬及沈可欣，今日(2日)出席處境劇《愛・回家之三代同糖》宣傳。

繼樊亦敏和歐瑞偉之後，上一代《愛・回家》飾演路小小的羅毓儀及飾演Rebecca的沈可欣亦加入《愛・回家之三代同糖》，今次飾演車婉婉啲鄰居，婉婉大讚對方好正及專業，大家擦出不少火花，又認為處境劇集數多，不斷會有新支線發展，加入新演員屬正常：「公司同監製有佢哋考量，而且佢好適合個角色，信任公司嘅安排。（會唔會覺得係舊酒新瓶？）我唔知，因為我冇演上一輯《愛。回家》，每日劇本都好緊湊，一直追緊存貨，我日日都要追劇本，對我嚟講，觀眾朋友嘅反應，睇到開唔開心，係最重要嘅結果。」

沈可欣表示沒有收視壓力：「我個人幾Chill吓，因為不是自己能力可控制，做好自己嘢配合就最好。」婉婉就稱沒有留意收視，因為要忙於拍劇及要幫兒子考試溫書。對於前總經理曾志偉形容HOY新劇《你的保安李寶安》收視高只是放煙花，婉婉說：「其實喺呢個收視或者電視節目管理方面我係冇經驗，所以我覺得呢啲有資歷嘅前輩去批評或者畀意見，其實係佢哋經驗累積出嚟。我自己冇呢個background，但係佢哋講嘅說話對我嚟講係一種好大嘅鼓勵，因為一個處境真係一個長時間嘅奮鬥，要點樣去保持熱度，係要多方面去配合，唔同演員入嚟都會有唔同化學作用，亦需要觀眾去畀意見我哋。」

羅毓儀（Yuki）預告角色除了女僕裝，還有多個不同造型，又會大量派糖，直言令男友林俊其（Kris）感心痛：「佢有同我對劇本，因為劇情太Sweet，睇到佢好心痛，佢要求我送模型同包包安撫佢。」她又稱男友也想加入《愛》劇，問到是否想跟她演情侶？她笑說：「我劇中已經有男友，做情侶就冇可能，佢要做小三keep到幾耐。」對於陳星妤在《女神配對計劃2》打水戰環節中對陳若思（Amber）下手重，被網民批表現兇狠，身為「花生團」的Yuki看到也大感意外，認為當日戰況的確非常激烈：「見到星妤㩒Amber落水都好驚訝，擔心Amber有冇事，見佢條頸都有少少整親，有問佢駛唔駛搽嘢。（你O晒嘴？）我係估唔到佢按Amber落水，都怕Amber有事，唔知佢識唔識游水。」

本身是「遊戲節目」常客的Yuki，認為玩競技遊戲真的容易發生意外，也在所難免。問到會否覺得陳星妤是本色演出？她坦言跟對方不熟絡，但亦公道的說：「大家只係玩得投入，如果唔投入，成個騷就唔好睇。」問到若由她跟陳星妤鬥，誰人會贏？Yumi笑說：「雖然我身形細小同手短，但我好勝心都強。」對於今季女神是非多，她認為證明節目多人睇，有討論度是好事，而且私下有接觸她們，覺得大家都很友善。

甄敏芳（Jenny）和穎喬透露只屬客串性質，Jenny說：「因為《愛。回家》係由細睇到大，冇諗過有一日可以參演，覺得好夢幻，第一次演出好有趣。（着女僕裝有冇壓力？）有，因為同我唔係咁夾，要適應。」穎喬笑言女僕裝跟自己平日的男仔頭打扮很不同，還有平日說話時不會如此高音。