預算有限如何玩轉萬聖節？這些中環萬聖打卡熱點你不可不知

（文、圖：黃新雅）萬聖節就快到，慳妹也想用最少預算感受吓萬聖節氣氛，即刻祭出壓箱底的私服！本期慳妹帶你一探全港3大萬聖節服裝道具店，看看如何用不足50元買齊三件神秘扮靚道具，由路人模式一秒加入萬聖節變裝隊伍。花了錢就不要浪費啦，我們變完裝順路去中環皇后像廣場花園打卡「巨型眼球」和禮服骷髏，平平哋玩轉萬聖節。

萬聖節變裝道具邊度買最平呢？慳妹來到位於康怡廣場的A字頭百貨，3樓的萬聖節專區超有氛圍感，假人模特已經變好裝，天花板上亦有南瓜及眼睛氣球裝置。貨架上的變裝道具琳琅滿目，包括吸血鬼斗篷、女巫帽、惡魔發光頭飾、假肢道具、動物頭套等等，無論你想打扮成魔法女巫、恐怖吸血鬼、淘氣小惡魔、可愛小動物，甚至是恐怖電影中的經典角色，都有的選！不過類似血漬、傷疤貼紙、假血、閃粉等妝容道具就未見到。而且全場萬聖節產品仲有五折優惠，性價比真係超高，美中不足是不包含萬聖節造型公仔。如果你想平平哋感受吓萬聖節氣氛，不妨來這裏挑選下。慳妹看中一款女巫帽，原價25元，折後才10元；再加上一隻毛蜘蛛道具，以及一支惡魔三叉戟，總價只需43.1元。

下一站慳妹來到位於中環的D字頭百貨，這裏的萬聖節道具只有一個貨架，大多是頭飾，小部分是Cosplay衣服。優惠方面，萬聖節配飾精品2件八折，都算抵買。不過店內有賣超多種類的萬聖節糖果，仲有三叉戟包裝的軟糖，可以食又可以玩。

挑選服裝小貼士

萬聖節要融入氣氛，又不想專門買一套只穿一次的Cosplay服裝？其實只要識得揀色、識得配搭，好耐無穿的櫃底衫一樣可以變出高級又有氣氛的萬聖節造型！黑色同白色是萬聖節最百搭的顏色。全黑造型可以走型格女巫、小惡魔路線；白色連身裙或白衫就有幽靈、骷髏感。如果嫌黑白太素，可以加入南瓜黃或者紅色單品，例如黃色針織衫、橙紅襪仔或頸巾。只要一件亮色單品做重點，就已經好有萬聖節feel。衣櫃入面有蕾絲領或者花邊裙就最好，蕾絲元素帶少少復古同暗黑浪漫感，配黑色連身裙或者白襯衫都好適合，影相會特別有氣氛。用舊衫就不用心疼整污糟，放心大膽玩了！

打卡中環「巨型眼球」

變完裝當然要打卡啦！中環皇后像廣場花園（南）已經換上萬聖幻境主題，四大主題裝置包括從噴水池旁冉冉升起的《魅影之眼》、坐落遮打道入口處的《甦醒之門》、熱門打卡點《鬼王寶座》，以及將涼亭幻化成鬼魅監獄的《亡魂禁地》。飄在半空的「巨型眼球」超矚目，吸引到不少人排隊打卡。噴水池邊有不少穿着西裝、禮服的骷髏，可以近距離合影。所有裝置由下午4時至晚上11時30分亮燈，於萬聖節當日更將延長至凌晨1時，大家可以在參加蘭桂坊怪物巡禮夜變裝派對之前過來打個卡。

最後來到中環石板街，街道兩旁的鐵皮檔搖身一變為萬聖節道具專門店，從變裝服飾、假髮、鬼怪頭套，到眼妝貼紙、血漬紋身貼、骷髏髮夾等，應有盡有。小店的商品都是明碼實價，沒有折扣，依然吸引到不少途人駐足挑選。如果你想在投入蘭桂坊狂歡前做最後的準備，石板街會是一個不錯的選擇。

（來源：《香港仔》2026年10月30日P4）