獲贈燒焊眼罩幽默自嘲「綠魔」 古仔化身將軍與草蜢鬥勁歌

草蜢紅館「THREE IN LOVE演唱會2026」，前晚舉行第三場，獲「三哥」苗僑偉與太太戚美珍、吳文忻和Tiger@MIRROR等捧場，當晚請來古天樂（古仔）擔任嘉賓，古仔化身「玉子漢堡」的「將軍」，即興清唱草蜢的《原諒我是我》。 ●香港文匯報記者 梁靜儀

當晚草蜢跳唱《華麗舞台》後，響起《天命最高》前奏，穿着紫色西裝外套和太陽眼鏡的古仔由舞台中升上，全場歌迷歡呼；合唱後，在電影《尋秦記》中飾演忠臣「萬良」的蔡一智笑說：「『項少龍』你穿越咗嚟紅館咩？我係『萬良』，介紹兩個人你識，（指着蔡一傑）呢個係『千良』，（指着蘇志威）呢個係『百良』！」蘇志威說：「我係『萬子』！」古仔立即以最新身份自我介紹，說：「我係『玉子漢堡』嘅『將軍』！」全場爆笑。蘇志威得意地說：「我剛才食漢堡時擦卡，第一張就擦到你單人卡，幾幸運呀！」

古仔即興清唱掀回憶殺

蔡一智指古仔是草蜢1993年的作品《原諒我是我》MV男主角，還挑機古仔即興表演，古仔淡定清唱，並率領全場大合唱，掀集體回憶。之後蔡一智又送上禮物給古仔，並說：「知你最近整襯隻眼，成日戴眼鏡，但一般眼鏡遮光唔夠好，送一副遮光好勁嘅畀你。」然後拿出一副疑似燒焊工業用的綠色眼罩，古仔笑說：「你哋覺得係燒焊用，我睇到似科幻片角色，綠魔人用。」蘇志威另外再送上一副名牌太陽眼鏡給古仔。古仔想立即攞走離場，遭阿智阻止，並笑說：「唔得，你欠我哋三隻唱片，想走？我𠵱家挑你，漏咗隻字，係挑戰你，唱草蜢快歌！」他們合唱草蜢的《好戲在後頭》，更走勻四面台，觀眾反應熱烈。

傑仔吻吳文忻打氣

此外，當晚傑仔獨唱《流淚的背影》和《失樂園》後，向觀眾分享治療期間遇到的感人故事：「有一日坐着輪椅去到照PET Scan（正電子掃描）間房，我必須要起身自己行去張床度。突然一位醫護人員走埋嚟扶我，佢話『你畀我扶你入去』，我話唔使，但佢堅持，我問點解？佢話『你唱嘅歌喺呢幾十年陪我走過高山低谷，你今日呢段路就讓我扶你行。』嗰一剎那我好溫暖，感覺好有愛。」

傑仔深深被感動，說：「原來我唱咁耐歌都唔知道，陪着大家走過不同嘅歲月。相反，你哋何嘗唔係陪着我一齊走過高山低谷呢？人生起起跌跌，記住，面對逆境要保持鎮定，正能量，fight低佢！明唔明？大家做唔做得到？」觀眾高呼「做到」。他續說：「正能量係好重要，接下來呢首歌係我嘅心聲，我作曲填詞，留意歌詞，『快樂』好重要！」之後他唱出《及時行樂》，並走到觀眾席第一行，跟癌症復發的吳文忻親吻，以示支持對方。