林憶蓮啟德騷設專屬粵語歌單

香港文匯報訊（記者 阿祖）林憶蓮 《迴響巡迴演唱會》將於5月16日及17日（星期六及日）假啟德主場館舉行。這次是林憶蓮（Sandy）睽違9年，再次於香港舉行個人演唱會。門票將於3月20日早上10時公開發售。

2026年「迴響巡迴演唱會RESONANCE : Reconstructed Hong Kong Exclusive」將重新構建製作，為香港樂迷設計專屬歌單。暌違9年再在香港開唱，Sandy感慨：「9年過得好快，但對一個唱歌嘅人嚟講，足夠經歷好多成長同轉變。香港係我歌唱之路嘅起點，係刻入心底嘅歸處。好多回憶都係同香港一齊寫成。今次首次踏上啟德主場館，對我嚟講，係一次最珍貴嘅重新出發。」唱足40年的Sandy珍惜與樂迷相聚：「我覺得係一種難得嘅緣分，更是我這40年裏，最溫暖嘅幸運。」

巡演以「崩壞、倒塌、重生」三大主題貫穿，香港站特別設計以粵語歌為主軸的歌單。Sandy說：「香港站編排會因應語言同情感重新整理，亦會加入更多粵語歌，將我對香港嘅心意揉進每段旋律，令節奏氣氛真正屬於香港。我一直相信，同一首歌喺唔同地方唱，應該有唔同嘅溫度，香港嘅舞台一定係最溫熱嘅。」

製作上亦會調整，Sandy續道：「有啲歌重新編曲，有啲段落會重新組合，我希望唔係複製，而是再為香港創作，用歌聲同香港對話。舞台對我嚟講，一直係最真誠嘅對話——同香港、同每位一路同行嘅你哋對話。」

演唱會舉行在即，Sandy仍盼能守住初心，在舞台上分享她對歌唱的熱誠，分享道：「每次獻唱，我都不忘保持真誠，帶着滿心溫柔唱歌。唱咗咁多年，唔係為咗證明啲乜，其實都只係想好好唱歌，唱畀喜歡我嘅人聽，唱畀這片滋養我歌唱之路嘅香港土地聽。珍惜每一次可以同香港嘅觀眾面對面嘅機會，珍惜每一次喺香港舞台上發聲嘅時刻。如果可以喺啟德呢個新舞台，再一次專心、安靜地，為香港好好唱歌，被大家嘅溫暖包圍，就已經好足夠，好幸福。」