黃劍文再演音樂劇《為你鍾情》 胡鴻鈞演繹潘迪華作品有壓力

香港文匯報訊（記者 梁靜儀）「香港音樂劇節 2026」將於明年1月11日至2月8日在香港西九文化區舉行，胡鴻鈞、黃劍文、香胤宅、雷深如、吳倩怡（Sinnie@Lolly Talk）等日前出席「香港音樂劇節2026」粉絲見面會，數百名粉絲現身支持，場面熱鬧。

黃劍文表示再演音樂劇《為你鍾情》既興奮又緊張，自言稍加排練就會進入狀態：「上次記者會見返大家，感覺已經返晒嚟，所以好期待快啲綵排。記得第一次係壓力大到喊，原來成team人係大家畀力量大家。呢部劇係講張國榮粉絲嘅故事，唱好多張國榮哥哥嘅歌曲，2026年係哥哥嘅70歲冥壽，令到呢個題材更有意思！」

現場公布胡鴻鈞加盟參演《白孃孃：一朵遲桂花》電影音樂會，他表示演繹潘迪華前輩作品有壓力：「希望可以為經典作品注入啲新元素，嚟緊要日日排練，好享受呢啲充實嘅感覺，電影音樂會係好特別嘅演出方法，因為有紀錄片欣賞，又有管弦樂團一齊演出、要唱經典嘅歌曲，係一個好好嘅學習機會。」