家庭生活帶來大改變 羅力威坦言「以前唔帶腦」

香港文匯報訊（記者 阿祖）歌手羅力威與太太雨僑日前到新城廣播接受《寵愛您》訪問，談及二人婚後育有5歲女兒Harper和2歲兒子Harvey，家中亦飼養了一隻15歲的異國短毛貓「燒燒」，羅力威婚後才跟「燒燒」住在同一屋簷下，所以花了一小段時間才跟牠混熟。自從雨僑懷有大女兒，由於不方便蹲下及接觸貓沙和便便，羅力威便擔起照顧愛貓的責任：「呢隻貓的確好得意，好嗲又溫純，佢唔似一般貓咁敏捷，所有嘢都好慢，同我生活節奏好似。」

至於患有高敏感特質的女兒，雨僑透露囡囡比較特別在意衛生，她表示：「因為佢出世時隻貓已經喺度，所以佢都接受，不過見到地下有貓沙，佢就唔會踩落去，或者見到貓貓眼水印到床單，佢就會避開，整體上佢都係好有愛心嘅小朋友。」經過跟貓貓多年相處，羅力威已是名副其實的貓奴，他近日更創作了一首新歌《悠揚一曲》，一手包辦曲詞編監，講述寵物離別的傷心，羅力威表示：「新歌講貓貓，將離別嘅傷心組成創作嘅一部分，同時將傷心轉化同過渡。」羅力威除了邀請兒童合唱團合作，就連女兒都有份獻聲，他大讚表示：「囡囡一聽個旋律已經記得晒首歌，佢記性好好，例如朝早喺車上聽到首韓文歌，佢夜晚做功課時可以哼出嚟，雖然未必完全準確，但聽得出係朝早聽嘅韓文歌。」

羅力威和雨僑近年將重心投放於家庭，雨僑為了照顧家人，暫時並不考慮活躍幕前，她說：「有合適工作先做，小朋友頭幾年陪伴、教育同照顧都好重要，疫情期間冇得出街，放寬咗之後經常有共聚時間，又可以去吓旅行，都好開心同滿意，將來佢哋大啲嘅工作安排仲未諗，但現階段好享受生活。」而羅力威則坦言家庭生活帶給他很大改變，而且更勝從前：「過往好似唔係好帶住個腦，工作時有公司同事安排，冇乜特別諗個目的，依家冇公司約，所有嘢都好唔同，有好多空間，付出好多努力去創作、照顧家庭同工作，以前覺得冇需要，又冇空間，但遇到太太後，人生有咗意義同追求，呢一刻好幸福美滿。」雨僑聞言即露出甜蜜笑容。