農夫被胡敏芝「激親」 C君無意再做TVB高層

農夫組合的陸永權（陸永）、鄭詩君（C君）夥拍胡敏芝（Karen）拍攝旅遊節目《旅行最緊要近》。一向轉數快的農夫，終於遇到對手，二人被Karen激到哭笑不得。曾擔任J2（現稱TVB Plus）創意總監的C君，今次以自由身形式與TVB再合作，被問到回巢再做高層的可能性，C君即斬釘截鐵拒絕。

●採：香港文匯報記者 梁靜儀 攝：北山彥

陸永和C君日前聯同Karen一起接受香港文匯報訪問，時隔四五年再合體拍攝綜藝節目，陸永直言與C君一齊做音樂及演出多年，日見夜見已見到悶，「合體」做節目都盡量可免則免，所以今次他們答應做主持，首要條件就是要有個唔悶、有新鮮感及有趣的拍檔，最終就找了Karen。問到Karen是否二人欽點演出？C君笑說：「係冇其他人肯再同我哋拍。」其實C君早在擔任J2創意總監時已睇中Karen：「其實係當時我做J2，Karen就喺（藝員）訓練班，我覺得呢個女仔幾得意，又幾好笑，又傻傻哋，安排佢主持啲J2節目，有唔少監製讚佢，起用佢，到現在我哋拍節目，TVB Plus就提議我哋用返Karen去拍，可能會有新元素，既然大家意見相同，用Karen當然好啦。」

獲前高層欽點拍節目，問到Karen可有受寵若驚？Karen笑着承認道：「因為當年訓練班出來幾個月，C君就揀咗我入J2做主持，作為新人係好難得咁快有唔同機會拍節目，當時係受寵若驚，不過又唔係好驚，係喜多啲。」C君笑指其實不算很寵，因為當時選了廿多個J2ers，而且成為J2ers之後，都要監製肯起用才可以。

做定功課反被嫌？

談到Karen的表現，C君指Karen表現稱不上「喜」出望外，反而有少少激氣。陸永指原本製作組想找一個專激他們的人，C君就笑指今次「搵啱人」，達成了他們的原意。問到Karen可知自己哪方面激嬲兩位前輩？Karen估計與自己轉數慢有關：「因為佢哋轉數好快，我又真係太慢，有時佢哋講完一個笑話，去咗第二個話題，我才識笑返第一個笑話，可能咁令到佢哋好激氣囉。」她謂事前都做定功課，看很多節目拍攝的資料。不過陸永就嫌她做太多功課，陸永說：「我哋一齊拍嘢唔係要呢啲資料性嘅嘢，係要當一種體驗，佢好擔心我哋接唔到，後來就慢慢建立咗個信任，知我哋唔會接到，所以佢之後索性唔睇。」Karen坦言當初知道跟兩位前輩合作，心情緊張又有少少壓力，幸好合作後一掃而空。

今次他們去了廣州、佛山、順德、清遠、潮汕、惠州拍攝節目，從奢華星級精緻料理，到特色罕有獵奇風味，體驗豐富美食層次。除了美食，三人又玩水中密室逃脫、激流越野車及熱氣球。拍旅遊節目少不免要玩刺激玩意，講到「刺激」玩意，C君就笑指Karen的刺激玩意就是刺激他們，農夫異口同聲說：「佢係可以激到我哋講唔到嘢，（遇到高手？）可以咁講嘅，（同唔同Karen再合作？）唔同Karen就唔合作喇。」雖然被取笑轉數慢，但Karen卻大讚兩位前輩：「佢哋轉數快，（缺點呢？）佢哋對後輩太好喇，佢哋真係無鬧過我。」被C君及陸永取笑轉數慢的Karen，自覺拍完節目後，轉數快了一拍半，說話不再「一嚿嚿」，都希望再與兩位再拍第二輯。

出道25周年有大計劃

近年主力在內地開騷的農夫，被問到與TVB可會再合作？陸永表示都有可能，而他們目前是以自由身形式合作。在2021年出任J2創意總監一職的C君，當時C君以專心發展音樂事業為由，於2023年中卸任，TVB總經理曾志偉說過會等他回巢。問C君會否回去做高層？C君斬釘截鐵說：「梗係唔會啦，嗰段時間做咗一年多，做咗好多創作，我哋都做好多幕後，唔一定喺個機構度才做到幕後，好多嘢都係我哋自己創作，遠比想像中忙碌，只可全程投入，冇得一心二用。」陸永亦稱暫時對做高層不感興趣，想多放時間專注做返音樂。

今年是農夫出道25周年，陸永預告將會有大Project，可能不止25周年演唱會，有可能與其他單位合作，但詳情到時再公布。