佛山開唱以珍惜愛作主題 洪卓立請許靖韻做嘉賓「極i」配「極e」

香港文匯報訊 英皇歌手洪卓立（Ken）去年馬不停蹄於內地舉行「The Other Planet巡迴音樂會」，踏入2025年巡演繼續，首站佛山門票一開賣即售罄，二千八百座位全場爆滿。

Ken表示音樂會每站都有主題，佛山一站以電影《破·地獄》概念作主題，「睇完《破·地獄》首映後就決定用呢個概念做佛山站主題。雖然個感覺好沉重，但又好想同入場嘅觀眾分享，無論『珍惜』好、『愛』又好，希望每一位入場嘅觀眾都可以拎到啲嘢走。」選曲方面，Ken亦精心挑選，特別在medley部分，有自己歌亦有其他歌手的歌，「今次成個核心medley揀咗《你那邊好嗎》《無他》《寂寞的季節》《九秒九》《白頭到老》。」Ken直言於構思及綵排時已經想喊，「以為自己handle(控制)到，點知開騷嘅時候都係忍唔住，呢幾年自己嘅經歷再加埋成個氣氛，handle到但忍唔住。」

當晚Ken更請來許靖韻（Angela）任嘉賓，「我曾做她演唱會嘉賓，早排又出咗首新合唱歌《作賤·矛盾》，所以點都要請番佢嚟做嘉賓，唱吓新歌。」除此之外，Ken又自爆請Angela做嘉賓有一個好處，因為自己可以「講少啲」，「我唔使度同佢講啲咩，佢上咗台個e人(外向)制一開着咗，連導演cue佢，同佢講差唔多要放我落台quick change都唔理，我企喺個台度唔知做咩好，哈哈。」而這個組合南轅北轍，Ken的「極i」及Angela的「極e」，但二人出奇地合作無間，自推出合唱歌開始宣傳後笑料百出，作為i人(內向)的Ken更經常被Angela強迫「營業」，拍攝大量他平時不會拍的相片，令阿Ken勁無奈又搞笑。