演活復仇女王 被老公笑「本色演出」 楊茜堯自認「虎媽」 拍劇當放假

楊茜堯（前名楊怡）在新劇《黑色月光》演活「復仇女王」，獲外界睇好可憑《黑》劇再奪視后，但卻被老公笑她是本色演出，她又承認私下是「虎媽」一名：「都係被逼成。」

相隔六年重返無綫娘家拍劇的楊茜堯，在近日熱播的《黑色月光》中飾演危機公關專家余滿月（Moon姐），因18年前被富三代蔣基俊（馬志威飾）下藥侵犯以致家破人亡，處心積慮進行復仇大計。甚少演這類角色的楊茜堯笑言感到過癮之餘，亦為Moon姐感到辛苦：「因為未拍過呢類型角色，TVB劇集都比較少呢類題材，加上女性復仇主題更加少，所以今次對我來說係個挑戰，現實做唔到呢啲嘢，一個女人靠自己忍辱18年，建立咁多人際關係去為咗復仇，諗起其實幾辛苦。」

劇中Moon姐的氣場、兇狠、仇恨、鄙視與冷笑情緒的秒速轉換，更被網民封為「復仇女王」，指她「生了孩子後，氣場更加厲害」，她解釋其實是有口難言：「因為呢個角色同我以前演嘅角色唔同，以前演女強人會做好多眼神及可以講好多說話出嚟，但呢個角色好多嘢喺心裏面，唔可以用言語去表達，亦都唔會畀人知她內心世界，我諗咗好耐，如果呢個角色我唔去好好表達自己的面部表情或眼神，好多嘢都會好靜態，觀眾就可能覺得好悶或者未必領略到我心入面嗰種感覺，所以我同自己講，點樣去設立呢個人設，喺一啲細微位讓觀眾可以睇到我情緒上一啲轉變。」

拍檔各具特質 不搶鋒芒

談到最難忘的場口，楊茜堯回想有好幾場情感戲令她難忘，其中她與親家姐楊卓娜及細妹黃翠如的三姊妹感情戲，由吵架到冰釋前嫌，去講出大家多年來的心結，肺腑之言都令她好感動。今次更是楊茜堯與胞姐楊卓娜入行超過20年以來，首次於劇集中以姊妹檔形式演出，她承認與親家姐演出都會比較投入，加上胞姐是比較感性的人，可以互相帶動對方入戲，即使首次合作的黃翠如，也感覺她是親妹，沒想過三人走在一起合作有火花，又笑言劇中每位演員的演技都提升了。

楊茜堯在劇中與飾演豪門千金卓慧雲的林夏薇（薇薇），是繼2014年《收規華》後再度合作，今次兩位視后大鬥演技，更少有地沒有不和是非傳出。楊茜堯自言拍劇多年都很少傳出是非，因為大家都好用心做好自己的角色，不是取巧，每個演員有自己的特質及出色的地方，可以利用劇中性格展現自己天賦技能，每個角色都有自己的崗位，不用喧賓奪主去搶鋒芒：「好似薇薇有好靚嘅樣貌及身材，加上服裝配搭，真係展現到富家女嘅感覺，呢啲就係每個演員嘅特質。」

婚前婚後皆不拍親熱戲

劇中飾演Moon姐年輕版的廖慧儀及林夏薇分別與馬志威有床戲演出，楊茜堯笑言以前未婚都拍不到親熱戲 ，現在更加「硬晒軚」不會做。問她平時在家中是否也是用「Moon姐」凌厲眼神望老公羅子溢？她笑稱老公指她多年來都是扮好人、扮賢妻良母，反而今次的角色是其本色演出。問她會否讓一對子女看《黑》劇？她直言不會：「第一時間唔啱，第二都唔會畀佢哋睇住。」由於子女年紀尚幼小，雖然知道她是演員，但還不太了解她的工作，有時他們見到外婆在平板電腦追看她的劇集，見到劇中的她眼紅紅，就會問她是否不開心而哭？她才發覺子女原來相當留意媽咪的情緒，所以暫時不會讓他們看劇。

楊茜堯當媽後減少拍劇，將重心放在家庭上，今次再拍無綫劇集雖然回響大，但她直言年紀大，不會再一年拍兩三套劇：「現在拍劇就似放假一樣，做自己鍾意嘅事，同外界接觸，不用困住一個空間對住小朋友。再拍劇就會視乎除團隊及劇本外，最重要是時間。」將家庭放在首位的楊茜堯，承認在家中是「虎媽」一名，但都是迫不得已：「其實我唔想做虎媽㗎，問心有幾多個想做虎媽？都係因身邊啲男人唔做。」她謂做「虎媽」都是受社會趨勢及風氣所造成，雖然可以唔跟風，但又擔心小朋友跟不上，所以必須取個平衡，她坦言現時女兒一星期有五天都要上興趣班，還未開始學樂器，她覺得小朋友從小就習慣不會覺得辛苦，辛苦的都是大人，而細仔快三歲都要準備為他安排興趣班。

採訪：梁靜儀

攝影：彭子文

Hair：Jan Chiu @ Il Colpo Pacific Place

場地提供：都會海逸酒店