（香港文匯報記者 梁靜儀）隨着巴黎奧運的火熱進行，各大電視台紛紛招募教練和運動員加入評述團隊，希望透過他們的專業視角增加轉播的吸引力。TVB動用不少運動員和藝人參與《2024巴黎奧運》報道，不時有香港及巴黎連線直擊比賽及賽後訪問 ，昨日（28日）港隊運動員何瑋桁（桁仔）於奧運男子重劍32強比賽止步，莊琬晴（Edith）及陳銘泰第一時間貼身獨家直擊桁仔賽後感，並與身處香港、同樣是港隊劍擊隊的連翊希（Coco）隔空連線。
另外，香港重劍運動員江旻憓奪金而令香港劍擊運動備受關注，但為ViuTV擔任奧運評述員的蔡俊彥表現卻引來網民熱烈討論，有份為HOY TV擔任奧運星級主持、剛退役的男子花劍「大師兄」張小倫就爆seed反擊，希望大家尊重運動員及在電視台做旁述的運動員。
何瑋桁（桁仔）於奧運男子重劍32強比賽止步，當比賽完Coco一接通連線，即恭喜桁仔，並溫柔地安慰桁仔不要遺憾：「我見到你開頭領先咁多，我好為你驕傲呀!」之後當Edith柔聲地問到桁仔失落東京奧運後再踏上奧運舞台的感受時，桁仔即忍不住自責落淚：「我自己都知道我嘅對手我係唔夠打嘅，我真係好想贏。」桁仔說到此處即傷心拭淚並只懂說：「Sorry！」Edith見狀即輕拍桁仔予以安慰，Coco則大叫桁仔頂住兼打氣謂：「要硬淨呀！」、「你今日好叻呀！」互動相當感人。桁仔平伏心情後亦大派勵志Bite：「嚟緊我會繼續努力， 因為呢個對手我知係唔好打嘅對手，我同呢個對手打咗十幾年，一路以嚟打咁多次比賽未試過多過五分。但今日一開始領先咗，我覺得自己有機會，但係又把握唔到，我覺得……我可以再做好啲！」
「跳遠王子」陳銘泰更感同身受安慰桁仔：「作為運動員見到瑋桁行到奧運呢一步都知佢經歷咗好多。你已經成為今年男子重劍第一人，都為你嘅隊友創造咗一個歷史，我哋仲好年輕，今次只係第一步。」
返回廠後，Coco再為港隊男子重劍運動員發聲，期間更數度哽咽落淚：「頭先我見到呢個真情流露嘅訪問，我自己都好感動，因為桁仔攞咗亞運會銅牌、亞洲錦標賽金牌，已經係破曬紀錄，創造曬男子重劍嘅歷史。但佢依然不卑不亢，我好想Shout Out To所有男子重劍嘅運動員……」說到此處，Coco聲音哽咽，邊唞大氣邊哽咽落淚謂：「你哋好叻……（我）仲激動過尋日呀，我覺得男子重劍團隊……成日都係只提女子重劍，男子重劍一路以嚟行咗好多嘅路，因為男仔比賽比女仔難打好多。所以好多男子重劍運動員，都好值得我哋香港市民關注。」
蔡俊彥望多包容會改進
劍擊運動員蔡俊彥近日為ViuTV擔任奧運評述員，但網友卻認為他講解生硬，準備不足：「聽蔡俊彥講嘢真係好辛苦，鬼食泥咁，又唔做好準備，講到『甩甩咳咳』，有時又發緊夢咁。」對此，蔡俊彥也不避嫌地回應，希望大家能多些包容，給他更多機會學習和改進。
小倫表示：「其實我覺得所有運動嘅運動員都有付出好大嘅努力，無論係可以參加比賽，又或者喺各大電視或者公開場合做評述嘅師弟妹們，都好花心思做好分內事，但係我作為大師兄，見到佢哋不斷喺網上被受評擊，實在睇唔過眼，希望為佢哋發聲。 面對網民嘅評擊，我有強大嘅心臟，但對於平時只做好運動員訓練本分，師弟妹們佢哋，真係承受唔到呢啲外界嘅惡意評論，所以希望為佢哋表達心聲。 」
小倫表示做奧運評述比做運動員更難：「做劍擊運動員，我只需要做好本分，每日操練就可以，但係做電視台嘅評述，我事前要做好多準備功夫，做好心理質素，難度高好多。 」小倫稱從未因為網上的言論而不開心，問到若有以劍擊為題材嘅電影會唔會接受呢？小倫即表示：「梗係接受啦！只要可以將劍擊呢項運動畀更多人知道及認識，而電影亦都係一個宣傳渠道。 」
0
已點過讚
0 / 255