陳健安推出首張彩膠唱片《Life after Life》

香港文匯網（記者 子棠）陳健安前日（15日）迎來38歲生辰，並於同日推出首張彩膠唱片《Life after Life》，雙喜臨門。安仔興奮地說：「揀呢一日出嘅原因好簡單，想每年生日都記得人生第一張彩膠係幾時出。」他貼心指，希望「族人」（安仔歌迷專稱）能在16日的音樂會以及20日與歌迷慶生的聚會前收到唱片，到時能為大家簽名。

《Life after Life》彩膠唱片共收錄10首作品，彩膠封面是安仔靠在綁有拼布的椅子上，安仔指着布上圖案逐一解說：「《創作者的派對》同歌迷玩咗一個遊戲，我畫一筆，佢哋再不停畫上去，我第一張專輯《本原》嘅封面都包咗喺張凳上面。呢張碟嘅概念係，『你嘅過去成就𠵱家嘅你』，痕跡疊痕跡，我依靠住呢啲過去成就𠵱家嘅我。另外CD封面會見到好多唔同Layer，一層一層咁。彩膠就係晒成個Setting出嚟，放大係會睇到凳上面嘅圖案。放大版本嘅感覺好唔同，睇到好多Details。」

至於彩膠內頁記錄了每首歌的「出世紙」、每位創作人當下的想法，安仔形容就如日記般寫下每首歌的創作點滴。彩膠內頁有小時候與父母的合照，令他勾起不少童年回憶：「阿媽抱住我，呢張相喺屯門市鎮公園影，細個阿媽帶我去好多地方，好多嘅第一次都係佢帶畀我，大咗覺得自己有能力就想做返呢個角色，𠵱家到我帶佢去旅行。」近年經常帶媽媽去旅行的安仔表示每次都會挑選雙方都未到過的地方，希望可以共同感受所有的「第一次」；而剛剛就與媽媽去完福岡。孝順的他又指人生第一張彩膠唱片，當然有預留及附上簽名送給媽媽。