香港文匯報訊（記者 梁靜儀）張頴康在前晚播出的《反黑英雄》中，飾演PTU沙展蘇國威的他遭販毒集團阿頭「太子」（謝可逸飾）施以酷刑，對其動用活埋私刑。談到拍攝情況，張頴康指由於拍攝時只顧投入角色，故完全不知道痛，直到拍完回家才驚覺雙膝有瘀傷：「其實我自己都覺得好得意，只要一埋到位就真係唔識收，你話要跪就一嘢跪落去，拍嘅時候唔覺痛㗎，但返到屋企就發現有少少撞瘀。其實拍戲咁多年都經常有呢啲情況，因為一埋到位淨係知道想做好個效果，演起上嚟會幾忘我，我太太咁多年都見慣㗎喇，就係我無端端返到去呢度又瘀嗰度又瘀，又會損咗一撻咁。」

他謂最難忘有場後巷追賊戲，因為意外被障礙物絆倒跌落地，導致手指尾至今未能伸直。至於「水刑」場口，他指因環境衞生問題，在水中張大雙眼拍攝難度更高，並感激工作人員的貼心安排：「劇組好好，知道我要浸個頭落去，都盡量清潔乾淨個浴缸畀我拍，同埋預備啲乾淨嘅食用水畀我浸落去。」他續指所有水中特寫鏡頭，都是另外安排在乾淨的大魚缸中進行拍攝，足證劇組相當暖心及對演員照顧周到。

至於黃俊豪被活埋場口亦相當震撼，透露「跌坑」一幕因為安全問題，由替身代為上陣，其他場口則全部由他自己親身上陣，他說：「撥埋嚟嗰啲全部真沙嚟，拍時導演有叫我擰埋一邊，因為都驚真係成個眼耳口鼻都係沙，但我覺得喺被矇住眼嘅情況下，又就嚟死，個角色應該都唔會理咁多嘢，我覺得（硬食）好似真啲，所以我都照做，當然之後係有排清潔嘅，但當時場地冇沖涼嘅地方，都只能拎住條毛巾係咁洗。」他又大讚對手張頴康是十分專業的演員，又提點他。