香港文匯報訊（記者 梁靜儀）一共四集的全新育兒真人騷節目《學神爸媽Get Set Go！》今晚（30日）首播，「學神爸媽」袁偉豪、張寶兒，聯同吳若希（Jinny），要在30分鐘內氹掂3歲小妹妹Yaris一齊唱歌，並從互動中找出Yaris難湊原因。

育有一子一女的Jinny打頭陣上場，並嘗試以「BB音」與Yaris拉近距離；第二位上陣的Ben則化身大細路與Yaris玩扭蛋機，之後借意問Yaris可否送他一個公仔，可惜Yaris扯到實唔願放手，Ben最後只能出絕招作狀扮喊搏同情。而最後出場的Bowie則成功以退為進氹掂Yaris合唱，是三人中唯一成功的挑戰者。

這個環節的亮點是，阿Ben出場時故作不經意地說：「嘩！有夾公仔機喎，幾好玩喎」，企圖自然地與Yaris打開話題，Jinny見狀即笑着向寶兒說：「Feel到Ben哥之前點樣追求你，扮經過冇同你講嘢，但其實一路撩緊你講嘢。」任務失敗的阿Ben，事後更歸究於自己的留鬚及長髮造型嚇親妹妹。

出名認真的Ben又出動「冷面湊B大法」，對着3歲的Yaris狂講大道理：「你唔好誤會以為夾到就係畀你。」一心只想要公仔唔想聽道理的Yaris即時喊到「扯蝦」，被震撼的Ben再說：「你放鬆啲先，喊就冇公仔喇！」冇晒符的他最終玩「棄權」，對着爆喊的Yaris說：「你行過隔籬房問Bowie姐姐可唔可以畀呢隻公仔你？」Bowie見狀即時大嗌：「搞錯，掟番個波畀我？幻想到未來係點！」

Bowie就極盡溫柔地攬着Yaris連番安慰，「心急豬隊友」Ben又出現「搞搞震」，他先向Yaris說：「快啲問Bowie姐姐可唔可以送（個公仔）畀你喇。」再向Bowie說：「佢想要呀，送畀佢啦！」打斷Bowie原本悉心部署的Ben遭老婆即時勒令封嘴：「你唔好嘈住先，你畀佢自己講啦，喊都唔畀人喊！」最終Bowie以一招成功冧掂Yaris唔再喊兼平伏情緒，獲大讚做得好好。