香港文匯報訊（記者 子棠）洪嘉豪（Kaho）的兩場處男紅館騷前晚來到尾場，張敬軒（軒公）現身做嘉賓，並送上大禮，為他報讀了美國知名音樂學院 Berklee College of Music 一年的音樂線上課程，令Kaho又驚又喜，坦言會努力去修讀，不令軒公失望。

當軒公登場，頓掀起高潮，叫喊聲high爆紅館。Kaho 與軒公合唱了兩首後說：「軒哥，我真係好多謝你，上次我話我上到紅館我會請返你，我做到啦！」軒公回答：「我從來冇質疑過！」軒公再向大家表示，由細睇到Kaho大：「嗰個放咗學嘅波牛，來搵佢媽咪（軒公前經理人）收工，同我一齊食飯嘅佢，今晚已經係男神一樣。今日仲同我講話自己好驚好震，但一上台佢就已經Prince Charming 咁啦！」

軒公更向Kaho送大禮說：「唔知幾時開始，呢幾年去紅館做嘉賓興送禮，我都帶咗份禮物嚟，既然你成日話我似你哥哥，做哥哥就梗係要供書教學，所以我幫你安排咗個學位！喺我人生之中，我覺得最大的遺憾係冇好好讀書，讀唔到大學或者一啲鍾意嘅藝術課程，所以我幫你報讀咗呢間學院嘅online課程，呢個課程係有證書㗎！上堂時間係2024年秋天，一共同你報咗五個課程，全個證書上堂上到2025年冬天，亦都唔會耽誤到你幕前工作，因為上堂時間係美國時間，香港凌晨！」然後把報讀課程的報名認證文件給Kaho看，又說：「你睇下個銀碼，係咪似八位數字 ……」Kaho及全場都即時嘩嘩聲，軒公就笑道：「唔係 ，我blur 咗個報讀價錢啦，但你望下我用咗個咩名幫你註冊埋學校個網站？」Kaho望着讀出「kaho study great great great ……」，軒公即時笑道：「你做咩讀晒出嚟，一陣俾佢哋炸爆你個email 啦！你真係好天真！咁你讀埋我幫你set嘅password，都係有意思嘅，反正可以再修改 ……」輪到Kaho醒目道： 「我一講完就即刻俾人改咗啦，你真係天真，軒哥！」引爆全場大笑。軒公再指Kaho讀完課程會送埋畢業帽，Kaho則認真向軒公道謝及承諾會好好讀書！

此外，Kaho當晚一度情緒失守大哭，喊足3首歌，因氣憤自己首場表現欠佳。而這晚還得到張天賦、周柏豪、陳健安、姚卓菲等眾多圈中人到場支持。