香港文匯報訊（記者 梁靜儀）張敬軒（軒仔）日前出席樹仁大學主辦的《IAE大學聯校歌唱比賽》擔任評審及表演嘉賓，順便為即將開辦的演藝學校揀卒，軒仔直言：「歡迎大家隨時DM我」，發掘有潛質年輕新一代。

由於主辦方事前保密功夫做到足，當歌唱比賽開始時，司儀介紹軒仔出場，觀眾的歡呼聲接近炸爆禮堂，同學們紛紛大叫「張敬軒你好靚仔呀、我愛你呀張敬軒、張敬軒除衫！」而軒仔還未表演，同學又已經嗌定安哥及安哥歌曲，氣氛高漲。

比賽前，軒仔不忘為各參賽同學打氣，又笑說：「聽講今日好似有人唱我啲歌𠻹喎，邊個咁沙膽！」隨後表示自己今次到來也是學習，「每次睇啲大學比賽我都覺得：『嘩，好勁呀佢哋！』有啲已經好似可以即刻出唱片咁樣，所以今日都希望嚟呢度睇吓有冇啲有潛質嘅新人，大家要加油啦！」

軒仔又上台分享表演心得，他表示最重要的是投入，enjoy台上的演出時間。他提到當日獲獨唱組冠軍，演唱陳奕迅的《浮誇》時，絕對是全程投入，觀眾亦很自然地被他牽動情緒，「我覺得社會上嘅工種都帶唔到嗰種腎上腺素興奮嘅感覺，所以我覺得做表演嘅人係好開心，應該好好地enjoy個舞台。」軒仔坦言在台上「驚係正常」，就算現在做直播演出，事前綵排得很好，一樣會緊張：「呢啲叫做『Stage Fright』，係完全正常，就算無論幾大嘅super star，佢哋都會有呢樣嘢。只不過係佢哋嘅經驗同training有冇辦法令到佢哋喺首歌嘅前奏，或者喺佢嘅第二句就已經可以冷靜到自己，自己的紓緩方法就是與觀眾交流，譬如上台同大家打吓招呼呀，或者真係當你好想得到佢哋回應嘅時候，就可以派吓心心，哈哈。當你同觀眾建立咗一個關係嘅時候，其實你會對佢哋有信任，咁你就唔會怕佢哋。」

隨後他便唱出《餘震》及《裝睡的情人》兩首歌曲，演唱過後觀眾不斷狂呼安哥，軒仔最後亦滿足觀眾需求，再次上台唱出《櫻花樹下》，其間有同學表示希望與軒仔合唱，軒仔亦一一答應，難得跟軒仔同台唱歌，兩位同學都十分興奮。

歌唱比賽結束後，過三百歌迷及同學仍未離去，紛紛於校門外守候軒仔，馬路邊的人龍長達百餘米，認真誇張。