香港文匯報訊（記者 梁靜儀）黎諾懿昨日以大使身份到屯門出席本地有機食品活動，更即場示範烹調有機菜式。

平日愛下廚的諾懿，推介大家多食用本地有機食材：「其實飛機貨碳排放好高，香港其實有一班好有心嘅農夫，做緊一啲好高質又平又有益嘅食材，環保又健康，自己煮嘢食，都希望材料新鮮，屋企有兩個小朋友，都想佢哋食得健康，例如養殖魚會用好多藥希望魚無病，我哋食落口唔多唔少都會有啲殘餘藥物。」諾懿表示家中也有種植香草、菠蘿，但就沒有種菜，因很花時間及精神去打理。他笑指大仔「小春雞」最拿手是「捉蟲」：「佢玩蟲玩得好叻㗎，識得分飛蛾蟲、螳螂蟲。」

問到為何昨日不帶兒子出席活動？他笑言怕兒子太高調：「佢鍾意上鏡，要『撳一撳』佢，我希望佢過啲正常嘅小朋友生活先。（唔畀佢上鏡？）又唔會，久不久啦，小朋友肯上鏡可以訓練佢自信心，佢對答冇問題，over好過under，好過掛住打機叫極都唔講嘢，佢高調起碼我撳到嘛。」

諾懿又笑指兒子比他更識交際，經常有禮物收：「試過有次去食飯，佢同我講話出去傾吓偈，就行咗出去叉住條腰同老闆娘傾偈，佢同老闆娘講好鍾意食鮑魚，氹到老闆娘送咗6隻鮑魚畀佢，同佢行果欄佢最開心，行過啲檔口會話『好靚喎啲生果』，老闆就送兩個蘋畀佢食，不過之後我都有買幫襯買生果。」