香港文匯報訊（記者 子棠）容祖兒昨日大年初三現身沙田馬場，為香港賽馬會舉行的「《農曆新年賽馬日》綜合匯演」擔任表演嘉賓，而財政司司長陳茂波聯同一眾嘉賓主持醒獅點睛及開幕儀式。祖兒特別挑選了性感的桃紅裝束，為大眾唱旺新的一年。而在年卅晚，她亦靠惠英紅瞓身出手幫忙下注，小發新年財。
沙田馬場昨日舉行農曆新年賽馬，這是繼2020年後，公眾人士不用登記預約，亦無須使用疫苗通行證即可入場，當日吸引大批市民進場希望可以發新年財。今次是祖兒二度獲邀擔任賀歲賽事表演嘉賓，為唱旺新的一年，祖兒以連場快歌勁舞為活動揭幕，並無懼寒流身穿輕露纖腰及事業線的桃紅裝束配合新春朝氣蓬勃的氣氛；她笑言已因寒流添了衣，原本不穿打底衫的。
問到是否已發新年財，事關英皇藝人每逢年卅晚例必到老闆楊受成家中團拜？她笑謂：「當晚係有玩魚蝦蟹，由楊生出本、阿Sa（蔡卓妍）做莊為人群服務，原本我都想湊熱鬧玩，但實在太多人完全逼唔到入去，結果要紅姐（惠英紅）飛撲瞓身黐住張枱幫我買咗一鋪500元、贏咗1,000元。而當晚影大合照都要影4轉先影齊人。」
祝願張敬軒成影帝
提到年卅晚亦是身在內地的鍾欣潼（阿嬌）的生日，祖兒表示已買了禮物送給壽星女。談及阿嬌成功修身變回索女，祖兒更搞笑說：「佢終於醒返，𠵱家簡直索爆！我最後一次見佢時，同佢講條腰咁靚，唔好再畀條腰走了，佢話佢終於明白，醒返了，知道應該點做。」
至於另一位好友張敬軒在首當男一的賀歲片中有背部裸跑鏡頭，祖兒聞言一臉驚訝，隨即幽默道：「真係㗎？之前睇佢嘅演唱會，仲心想點解佢個Pat Pat挺咗咁多，原來佢為套戲練臀，新年流流有得賞月，我一定會去捧場。（軒仔指為藝術犧牲博攞獎及希望成為千萬票房男星。）就係憑個臀？電影陣容強勁，千萬票房冇難度，祝佢票房有好成績，然後奪影帝；我亦希望之後可以同佢一齊合作電影。」
工作方面，祖兒透露會繼續做巡演及錄製新歌，為今年在港展開的全新演唱會做準備。會否催旺桃花，事業愛情得意？她打趣謂：「隨緣，搵日喇！我哋有個群組，全部『冇幫襯嘅人』都係用呢個標準答案，哈！哈！」
0
已點過讚
0 / 255