呂爵安謝票連踩十八場 即興清唱電影主題曲

香港文匯報訊（記者 梁靜儀）由新晉導演曾慶宏（Eric）執導的《過時·過節》曾先後入選「釜山國際電影節」及「香港亞洲電影節」，踏入第二周上映，累積票房快將衝破800萬元。首次參與電影正劇演出的呂爵安（Edan），前日（4日）現身九龍及新界五間戲院，連踩18場謝票親身答謝粉絲支持，而同場更有Edan的角色原型導演曾慶宏，自稱兩個「阿陽」同場的Edan與導演令現場氣氛相當熱鬧，令泣不成聲的粉絲都加快平復起心情。

Edan被問到《過》片對他的影響，他表示：「其實自己對演戲一直有一種迷惘，唔係好知道點樣為之好同唔好，尤其今次係比較正劇嘅處理，好幸運今次遇到導演Eric、毛姐（毛舜筠）同君豪哥（謝君豪）呢班前輩，同我傾好多計，不停調整我，令我有好多得着，包括係漸漸明白多咗演戲係點嘅一回事，更加要深入啲了解導演想帶出嘅訊息。」

電影中一眾角色因溝通不善而結下難解的結，Edan坦言自己在這方面也不太處理得宜：「我自己私底下喺屋企都唔係同屋企人有好多溝通，喺屋企似我家姐談善言戲中角色阿琪咁，唔係好出聲，由細到大好少同屋企人講心事。不過親身經歷呢部戲，我都有學習同屋企人多啲溝通，珍惜好緊要，所以呢部電影對我嘅意義已經超越一部作品，對人生有一定影響。加上我仲係好需要阿媽嘅照顧，所以唔會好似導演咁離家出走。」而身旁的導演曾慶宏也打趣回應：「放心，我𠵱家有同屋企人見面同食飯嘅！」

至於不少粉絲問到戲中阿陽與雀仔Anson Lo的關係，Edan回應說：「係好朋友嘅關係囉，不過如果喺電影嘅時空就未必會帶雀仔返屋企食飯啦，因為要帶咗我阿爸君豪哥返去齊齊整整食餐飯先！」

Edan由下午跑戲院到晚上，有見粉絲相當熱情地歡呼和鼓勵，不禁清唱幾句電影主題曲《攀上天梯的螞蟻》，惹起哄動，不少粉絲更陪同Edan大合唱，令謝票活動在一片歡樂和溫馨的氣氛下結束。