郭思琳誕重近9磅兒子 吳浩康謝妻忍痛17小時

香港文匯報訊（記者 林子棠）吳浩康（Deep）和郭思琳（Margiela）在本月14日榮升父母，Deep表示太太順利誕下重近9磅的兒子，並且由他親手剪臍帶，正與父親磋商為BB仔改名。Deep談及太太經歷了17個小時的生仔痛楚，心痛道：「太太原本諗住順產，但係去到醫院嘅時候個子宮頸仲未打開，未ready畀囝囝出嚟，醫生建議落催生藥，因為落咗催生藥後會不時有陣痛，仲要係幾犀利嘅陣痛，太太一路承受住痛楚，醫生同護士亦都同佢講子宮頸唔係好ready，唔ready嘅程度係，人哋有一至十度，我太太係一度都冇，太太內心失望之餘亦都好擔心，當然佢亦都好期待囝囝嘅出現，但始終冇呢方面嘅經驗，所以就會再擔心啲。佢足足經歷咗十七個鐘頭嘅呢個狀況……。我去到醫院嘅時候，姑娘第一句就同我講『其實你太太真係好忍得痛，佢可以咁樣頂，仲頂咗咁多個鐘。』所以真係好佩服太太，同埋真係好多謝佢，一啲都唔簡單，希望我可以繼續好好配合佢嘅生活啦。」Deep又感謝大家對他們一家人的關心、所有人的祝福也收到。